ل گۆر ئاژانسێن نووچهیان ئیرۆ ل دهڤهرێن جدا یێن سووریێ 11 كهس ب دهستێ هێزێن ئاسایشێ هاتنه كوشتن. تۆرا سوریێ ژبۆ مافێن مرۆڤان راگههاند كو دوه 18 كهس ژبال هێزێن رژێما ئهسهد ڤه هاتنه كوشتن و چالاكڤانێن سوریێ ژى راگههاندن كو پرانیا كوشتیان ل حمس و ئیدلهب و دهردۆرێ دیمهشقێ بوون. د ههمان دهمێ ده هێزێن ناڤخوه یێن رژێما سوریێ كهتنه ناڤا هن باژێركێن دهردۆرێ حهمایێ و ئۆپهراسییۆنێن لێگهرین و گرتنێ دهستپێكرن و ههروهها ئۆپهراسیۆنێن لهشكهرى و بۆردومانا ئاسمانى ژى دهرعا و حهما و دهردۆرێ دیمهشقێ ڤهگرت.
ههر د ڤێ چارچۆڤێ ده چالاكڤانێن سوریێ خویاكرن دهما هێزێن رژێمێ باژێرێ حهمایێ بۆردومان دكرن؛ ههشت چاڤدێرێن ناڤنهتهوهیى ل وێ دهرێ بوون. ههروهها شهر و پهڤچۆن دناڤبهرا هێزێن رژێم و لهشكهرێ سوریا ئازاد ل تاخا مزراب یا باژێرێ حهمایێ چێبوو و تهقین ژى ل دوو تاخێن ڤى باژێرى چێبوون و چالاكڤانێن سوریێ ژى راگههاندن كو دوو تهقین ژى ل دهڤهرا كۆرنیش یا باژێرێ ئیدلهبێ چێبوونه.
ل ئالیێ دن ئیرۆ ل سوریێ دهریێ بنگههێن دهنگدانێ ل ههمبهر دهنگدهران هاته ڤهكرن ژبۆ ههلبژارتنا پارلهمێنتهكه نوو كو ههفت ههزار بهربژار بهریكانێ د ڤێ ههلبژارتنێ ده دكن. د ههمان دهمێ ده دهستهلاتدارێن سوریێ ڤێ ههلبژارتنێ ب ڤهگوههستنا سوریێ ژبۆ قۆناخا فهرههى و دهمۆكراسیێ قهبول دكن؛ لێ د ههمبهر ده ئۆپۆزسیۆنا سوریێ بایكۆتا ڤێ ههلبژارتنێ كر.