ئیرۆ ل ئۆسلۆ یا پایته‌ختا نۆرویژێ لژێر زێره‌ڤانیه‌كه‌ خورت، یه‌كه‌م دادگه‌هیكرنا ئاندرێس برینج بریفیك یێ 33 ساڵی ده‌ستپێكر، كو ناڤهاتى ل ته‌مموزا ساڵا ده‌رباسبوویی 77 كه‌س كوشتبوون.

د ڤى وارى ده‌ بریفیك ل هه‌مبه‌ر دادگه‌ها ئۆسلۆ راگه‌هاند كو ئه‌و باوه‌ر ب دادگه‌هێن نۆرویژێ ناكه‌، ژبه‌ركو دادگه‌هێن وى وه‌ڵاتى "منحه‌" ژ وان پارت و ئالیێن سیاسی دستینه‌ كو پشته‌ڤانیا دادگه‌هێ دكن. هه‌روه‌ها گوت ژى ئه‌ز باوه‌ر ب ده‌ستهلاتا دادگه‌هێ ژى ناكه‌م.

هه‌ر د چارچۆڤا ئاخفتنێن خوه‌ ده‌ بریفیك راگه‌هاند، كو وى ئۆتۆمۆبیله‌كه‌ بۆمبڕێژ كرى ل هه‌مبه‌ر باره‌گه‌هه‌كا هوكومى ل ئۆسلۆیا پایته‌خت ته‌قاندییه‌ و، ب وێ سه‌ده‌مێ ژى هه‌شت كه‌س هاتنه‌ كوشتن و، پشتره‌ ژى گوله‌ به‌ردانه‌ سه‌ر خیڤه‌تگه‌هه‌كه‌ هاڤینى یا لاوێن پارتیا كاركه‌ر ل یه‌ك ژ گزیرتێن وى وه‌ڵاتى و، ب وێ سه‌ده‌مێ ژى 69 كه‌سێن دن ژى كوشتن.