له‌ موسڵ حه‌وت سه‌ركرده‌ی داعش ده‌ستگیر ده‌كرێن

سزای كوشتن بۆ 200 سه‌د كه‌سیان ده‌ركردبوو


شانه‌یه‌كی سه‌ر به‌ داعش كه‌ پێكهانبوو له‌ حه‌وت كه‌س له‌ موسڵ ده‌ستگیركران، كه‌  به‌ به‌دیارترین شانه‌كانی داعش له‌م شاره‌ هه‌ژمار ده‌كرێت.

فه‌رمانده‌ی پرۆسه‌كانی نه‌ینه‌وا ئاشكرای كرد، شانه‌یه‌كی سه‌ر به‌ داعش كه‌ پێكهانبوو له‌ حه‌وت كه‌س ده‌ستگیركران، ئه‌و شانه‌یه‌ سزای كوشتن و جێبه‌جێكردنی بۆ دوو سه‌د كه‌س له‌ شاره‌دێی حه‌مام عه‌لیل له‌ باشوری موسڵ ئه‌نجام داوه‌.

وته‌بێژی فه‌رمانده‌ی پرۆسه‌كانی نه‌ینه‌وا محه‌ممه‌د جبوری رایگه‌یاند، هێزه‌ هاوبه‌شه‌كان پۆلیسی فیدراڵ و خۆجێیه‌تی له‌ شاره‌دێی حه‌مام عه‌لیل توانیان حه‌وت تیرۆرست ده‌ستگیر بكه‌ كه‌ به‌ به‌دیارترین شانه‌كانی داعش له‌ شاری موسڵ هه‌ژمار ده‌كرێت.

جبوری گوتیشی، هێزه‌ ئه‌منییه‌كان ئه‌و حه‌وت كه‌سه‌یان بۆ باره‌گای فه‌رمانده‌ی پرۆسه‌كانی نه‌ینه‌وا گواسته‌وه‌، داواشی له‌ خه‌ڵكی شاره‌ده‌ێیه‌كه‌ كرد ئه‌وانه‌‌ی تاوانیان ده‌رهه‌ق كراوه‌، سكاڵای خۆیان له‌سه‌ر ئه‌و تیرۆرستانه‌ تۆمار بكه‌ن كه‌ ئه‌وانه‌ی كه‌سوكاریان له‌سه‌ر ده‌ستی ئه‌وانه‌ كوژراون.

رۆژی 10ی حوزه‌یرانی ساڵی 2014، جیهان له‌گه‌ڵ هه‌واڵی داگیركردنی موسڵ له‌لایه‌ن رێكخراوی "ده‌وڵه‌تی ئیسلامی له‌ عێراق و شام" ناسراو به‌ داعش، رۆژی كرده‌وه‌.

داگیركردنی موسڵ كه‌ دووه‌م گه‌وره‌ترین شاری عێراقه‌ له‌ رووی دانیشتوانه‌وه‌، گورزێكی كوشنده‌بوو كه‌ به‌ر حكوومه‌ته‌كه‌ی نووری مالیكی، سه‌رۆك وه‌زیرانی ئه‌وكات، كه‌وت.