له‌سلێمانى 115 شوێن داخران و 7 شوێنیش ڕووبه‌رووی دادگا ده‌كرێنه‌وه‌

به‌بڕیارێك

لیژنه‌ هاوبه‌شه‌كانی قائیمقامیه‌تی سلێمانی ئاماری شه‌ش مانگی رابردوی كارو چالاكیه‌كانی بڵاوده‌كاته‌وه‌ كه‌‌ سه‌دو پازده‌ شوێن له‌وماوه‌یه‌دا داخراوه‌‌.‌


ئه‌مڕۆ پێنج شه‌ممه‌ 2018.7.12، لیژنه‌هاوبه‌شه‌كانی قائیمقامیه‌تی سلێمانی ئاماری شه‌ش مانگ ( 1.1-2018.7.1 )ی رابردوی‌ خۆی بڵاوكرده‌كاته‌وه‌‌ كه‌ ژماره‌ی سه‌ردان و پابه‌ند نه‌بوان و سه‌رپێچی و بڕی غرامه‌ی تێدا رونكراوه‌ته‌وه.


له‌ئاماره‌كه‌دا‌ هاتووه‌؛‌ له‌ئه‌نجامی سه‌ردانه‌ به‌رده‌وامه‌كانی لیژنه‌ هاوبه‌شه‌كان بۆ بازاڕ و شوێنه‌ گشتیه‌كان (18) هه‌زار و سه‌د و چل چوار سه‌ردانیان بۆ پشكنینی بۆ ئه‌و خۆراك و كاڵاوشمه‌كانه‌ كردوه‌ كه‌ له‌لایه‌ن هاوڵاتیانه‌وه‌ به‌كارده‌هێنرێت، ئه‌نجام داوه‌. 


ئه‌وه‌خراوه‌ته‌ روو؛ له‌كۆی ئه‌و سه‌ردانانه‌ هه‌زار و چوارسه‌د و په‌نجا و شه‌ش پسوڵه‌ی سه‌رپێچی تۆماركراوه‌، هه‌روه‌ها؛ (2) هه‌زار و چوار سه‌د و حه‌فتاو دو شوێن ئاگادار كراونه‌ته‌وه‌ پابه‌ندی مه‌رج و رێنماییه‌كانی كاركردن بن.


به‌هۆی دوباره‌ كردنه‌وه‌ی سه‌رپێچیه‌كانیان (115) شوێن له شه‌ش مانگی رابردوو، به‌فه‌رمانی قائیمقامی سلێمانی و له‌لایه‌ن لیژنه‌ هاوبه‌شه‌كانه‌وه‌ داخراون و (7) شوێنیش له‌ دادگا په‌ڕاوی یاساییان بۆ كراوه‌ته‌وه‌.


ئه‌وش خراوه‌ته‌ روو؛ كۆی گشتی ئه‌و خۆراك و مادده‌ نه‌شیاونه‌ی له‌لایه‌ن لیژنه‌ هاوبه‌شه‌كانه‌وه‌ ده‌ستی به‌سه‌ردا گیراوه‌ و له‌لایه‌ن لیژنه‌ی له‌ناوبردنه‌وه‌، له‌ناوچه‌ی تانجه‌رۆی شاری سلێمانی له‌ناوبراوه‌ كه‌ زیاتر له‌ (198) تۆن و (678) كیلۆگرامه‌.


ئاماره‌كه‌ بڕی غرامه‌كه‌ی خستۆته‌ روو كه‌ (113) ملیۆن و (8) سه‌د هه‌زار دیناره‌ و‌ به‌پێی یاسا ده‌گه‌رێته‌وه‌ بۆ سه‌رداهاتی گشتی.


شوان عه‌زیز