ئه‌ندامێكی لیژنه‌ی ئاسایش : ئه‌مریكا به‌ عێراقی راگه‌یاندووه‌ كه‌ ئیسرائیل به‌رپرسه‌ له‌ بۆردومانكردنی حه‌شد

ده‌ركه‌وتووه‌ كه‌ ئه‌و هێرشانه‌ له‌ لایه‌ن فڕۆكه‌ی بێفڕۆكه‌وانه‌وه‌ ئه‌نجامدراون

ئه‌ندامی لیژنه‌ی ئاسایشی و به‌رگریی له‌ ئه‌نجوومه‌نی نوێنه‌رانی عێراق، عه‌بدولخالق عه‌ززاوی رایگه‌یاند "ئه‌مریكا به‌ عێراقی راگه‌یاندووه‌، ئیسرائیل به‌رپرسه‌ له‌و بۆردومانانه‌ی كه‌ له‌ میانی چه‌ند هه‌فته‌ی رابردوودا كرانه‌ سه‌ر كۆگا و باره‌گاكانی حه‌شدی شه‌عبی.

عه‌بدولخالق عه‌ززاوی له‌ لێدوانێكی رۆژنامه‌وانییدا گوتی: كاری لیژنه‌كانی لێكۆڵینه‌وه‌ له‌باره‌ی هۆكاری ئه‌و زنجیره‌ ته‌قینه‌وانه‌ی كه‌ به‌م دواییانه‌ له‌ چه‌ند كۆگا و باره‌گایه‌كی حه‌شدی شه‌عبی روویاندابوو، كۆتایی هاتووه‌.

ئه‌ندامی لیژنه‌ی ئاسایشی و به‌رگریی له‌ ئه‌نجوومه‌نی نوێنه‌ران، عه‌بدولخالق عه‌ززاوی ئاماژه‌ی به‌وه‌كردووه‌ به‌پێی ئه‌نجامی لێكۆڵینه‌وه‌كان، ژماره‌ی هێرشه‌كان، ١٢ هێرش بووه‌ و له‌ لێكۆڵینه‌وه‌كاندا ده‌ركه‌وتووه‌ كه‌ ئه‌و هێرشانه‌ له‌ لایه‌ن فڕۆكه‌ی بێفڕۆكه‌وانه‌وه‌ ئه‌نجامدراون.

عه‌بدولخالق عه‌ززاوی ئاشكراشیكرد "لایه‌نی ئه‌مریكی كه‌ به‌رپرسه‌ له‌ پاراستن و چاودێرێكردنی ئاسمانی عێراق، به‌ عێراقی راگه‌یاندووه‌ ئه‌و هێرشانه‌ له‌ لایه‌ن فڕۆكه‌ بێفڕۆكه‌وانه‌كانی ئیسرائیله‌وه‌ ئه‌نجامدراون".

ناوبراو راشیگه‌یاندووه‌ "ژماره‌یه‌ك له‌و هێرشانه‌ راگه‌یه‌ندراون، به‌ڵام به‌شی دیكه‌ی باس نه‌كراوه‌".

هیچ زانیاری و روونكردنه‌وه‌یه‌ك له‌وباره‌وه‌ له‌ لایه‌ن كاربه‌ده‌ستانی عێراق، ئه‌مریكا و ئیسرائیله‌وه‌ بڵاونه‌كراوه‌ته‌وه‌.