پاڵاوتنه‌كانی مۆندیال له‌ كیشوه‌ری ئاسیا بۆ ساڵی داهاتوو دواخران

به‌هۆی په‌تای ڤایرۆسی كۆرۆنای نوێ (COVID-19)ه‌وه


پاڵاوتنه‌كانی جامی جیهانیی (مۆندیالی) ٢٠٢٢ له‌ كیشوه‌ری ئاسیا، به‌هۆی په‌تای ڤایرۆسی كۆرۆنای نوێ (COVID-19)ه‌وه‌، بۆ ساڵی داهاتوو دواخران.

له‌ راگه‌یه‌نراوێكدا كه‌ له‌لایه‌ن فیفاوه‌ بڵاوكراوه‌ته‌وه‌، ئاماژه‌ به‌وه‌كراوه‌ یارییه‌كان كه‌ پێشتر بۆ مانگه‌كانی تشرینی یه‌كه‌م و تشرینی دووه‌م دواخرابوون، خراونه‌ته‌ ساڵی ٢٠٢١.

باس له‌وه‌شكراوه‌ كه‌ بڕیاره‌كه‌ به‌ هاوبه‌شی له‌گه‌ڵ كۆنفیدراسیۆنی تۆپی پێی ئاسیا دراوه‌ و واده‌ی ئه‌نجامدانی یارییه‌كانیش دواتر ئاشكرا ده‌كرێت.

هاوكات ئاماژه‌ به‌وه‌شكراوه‌ یارییه‌كانی پاڵاوتنی جامی ئاسیا بۆ ساڵی ٢٠٢٣ ساڵی داهاتوو، به‌ڕێوه‌ده‌چن.