وەزارەتی دەرەوەی ئەمریکا: ئێمه‌ چاوه‌رێ ئێران ناكه‌ین

وەزارەتی دەرەوەی ئەمریکا رایگەیاند: لە میانی کۆبوونەوەکانی گەڕانەوە بۆ رێککەوتنی ئەتۆمی کە وا بڕیارە ھەفتەی داھاتوو لە ڤییەنا-ی پایتەختی نەمسا بەڕێوەبچێت، چاوەڕوانی ئەوە ناکەن کە راستەوخۆ لەگەڵ ئێران کۆببنەوە بەڵام بۆ کۆبوونەوەش ئامادەن.

وتەبێژی وەزارەتی دەرەوەی ئەمریکا، نێد پرایز لە لێدوانێکیدا رایگه‌یاند: بەمەبەستی تاوتوێکردنی بابەتی گەڕانەوە بۆ مەرجەکانی رێککەوتنی ئەتۆمی بە ھاوبەشی لەگەڵ ئێران، ھاوبەشە ئەورووپی، رووس و چینییەکان، لەسەر بەشداریکردن لە کۆبوونەوەکان رێککەوتین.

کۆبوونەوەکان لە شه‌شی نیسان لە ڤییەنا دەستپێدەکات، پرایز، ئاماژەی بەوە کرد کە چاوەڕوانی ئەوە ناکەن کۆبوونەوەکان راستەوخۆ ئەنجامێکی کرداریی ھەبێت و جەختی لەوە کردەوە کە وتووێژەکانی زۆر قورس دەبێـت، بەڵام، لەو بڕوایەداین کە ئەمە ھەنگاوێکی تەندورستە کە بەرەو پێشەوە نابێتمان.

وتەبێژی وەزارەتی دەرەوەی ئەمریکا، نێد پرایز، ئەوەشی راگەیاند: کە وتووێژەکان لە شێوەی گرووپی کارکردن دەبێت کە یەکێتی ئەورووپا لە نێوان ئێران و لایەنەکانی دیکەی رێککەوتنە ئەتۆمییەکە درووستیدەکات و گوتی: لە ئێستادا، چاوەڕوانی ئەوە ناکەین کۆبوونەوەی راستەوخۆ لە نێوان ئەمریکا و ئێران ئەنجامبدرێت، بەڵام ئەمریکا کراوەیە بۆ ئەنجامدانی کۆبوونەوەی راستەخۆ.

نێد پرایز، ئەوەشی ئاشکراکرد کە تەوەرە سەرەکییەکانی کۆبوونەوەکان، بریتییە لەو ھەنگاوانەی کە لەسەر ئێرانە بینێت بۆ گەڕانەوە بۆ مەرجەکانی رێککەوتنی ئەتۆمی و لە ھەمانکاتدا ئەو ھەنگاوانەیە کە ئەمریکا لەسەرێتی بینێت بۆ سووکردنی سزاکانی سەر ئێران.

لەدوای ئەو کۆبوونەوەی لە نێوان نوێنەرانی یەکێتی ئەورووپا، چین، فەڕەنسا، ئەڵمانیا، رووسیا و بەریتانیا لەگەڵ بەرپرسە ئێرانییەکان لە رێگەی ڤیدیۆ کۆنفرانسەوە بە مەبەستی تاوتوێکردنی گەڕانەوەی ئەمریکا بۆ رێککەوتنە ئەتۆمییەکە بەڕێوەچوو، ئەوە راگەیەندرا کە ھەفتەی داھاتوو یەکەم کۆبوونەوە لە ڤییەنا دەستپێدەکات.