زریانی فلۆرنس گەیشتە ویلایەتی نۆرث کارۆلینای ئه‌مه‌ریكا

زیاتر لە 320 هەزار کەس کارەبایان لێبڕاوە

زریان و گەردەلولی ناسراو بە هوریکەین فلۆرنس بەیانی ئەمڕۆ هەینی گەیشتە کەنارەکانی ویلایەتی نۆرث کارۆلینا و بە خێرایـیەکی خاو و گەردەلولێکی بەهێز بەسەر ناوچەکانی باشوری ڕۆژهەڵاتی ئەو ویلایەتە تێپەڕ دەبێت.

دەزگای نیشتمانی ئەمەریکا بۆ چاودێری زریان و گەردەلول (هوریکەین) ڕایگەیاند زریانی فلۆرنس کە بە خێرایی 9 کیلۆمەتر لە یەک کاژمێردا دەڕوات، گەیشتووەتە سەر شارۆچکەی ڕایتسڤیڵ و لە ئێستادا خێرایی گەردەلولەکەی 136 کیلۆمەتر لە کاژمێرێکدایە.

کاربەدەستان دەڵێن هەر لە ئێستاوە فلۆرنس زیانی بەو ناوچانە گەیاندووە و زیاتر لە 320 هەزار کەس کارەبایان لێبڕاوە. هاوکات هەر لە ناوچەی کراڤێنی شاری نیوبێرن لە 150 شوێنەوە تەلەفۆن بۆ دەزگای بەهاناچوون کراوە و خەڵکی داویانکردووە ڕزگاریان بکەن چونکە ئاو چۆتە ماڵەکانیانەوە.