میسر: ئەردۆغان هەوڵ دەدات بیری توندڕەویی ئیخوان بڵاو بکاتەوە

وەزارەتی دەرەوەی میسر بە توندی وەڵامی سەرۆک کۆماری تورکیا دەداتەوە

دوای کۆچی دوایی محەمەد مورسی، سەرۆک کۆماری پێشووی میسر، رەجەب تەییب ئەردۆغانی سەرۆک کۆماری تورکیا رایگەیاندبوو، کە مورسی بە مردنی ئاسایی نەمردووە و تورکیا هەوڵی دادگاییکردنی میسر دەدات.

لةم بارةوة ئەمڕۆ پێنجشەممە 20-6-2019، وەزارەتی دەرەوەی میسر لە بەیاننامەیەکدا رایگەیاندووە، ئەو لێدوانەی ئەردۆغان دەستوەردانی ئاشکرایە لە کاروباری ناوخۆی میسر.

وەزارەتی دەرەوەی میسر لێدوانەکەی سەرۆک کۆماری تورکیا بە نابەرپرسانە ناو دەبات و پێی وایە ئەردۆغان هەوڵ دەدات بیری توندڕەویی ئیخوان بڵاو بکاتەوە.

هەروەک لە بەیاننامەکەی وەزارەتی دەرەوەی میسر هاتووە، رەجەب تەییب ئەردۆغان کێشەی ناوخۆیی لە وڵاتەکەی هەیە و بەو لێدوانانە هەوڵی شاردنەوەیان دەدات.

محەمەد مورسی، سەرۆک کۆماری پێشووی میسر ئێوارەی رۆژی دووشەممە 17-6-2019 لەکاتی دادگاییکردنی، گیانی لەدەست دا.

دوای کۆتایی هێنان بە حوکمی حوسنی موبارەک، محەمەد مورسی، کە لە ساڵی 1951 لەدایک بووە، بە هەڵبژاردن لە 2012 - 2013 بووە سەرۆکی میسر.