بەڕێوەبەرایەتی بەرەنگاربوونەوەی توندوتیژی دژ بەژنان ئامارەكانی 6 مانگی ئەمساڵی ئاشكراكرد

رێژەی دەستدرێژی سێكسی كەمبووەتەوە


بەڕێوەبەرایەتی بەرەنگاربوونەوەی توندوتیژی دژ بەژنان لەهەولێر ئامارەكانی شەش مانگی یەكەمی ئەمساڵی ئاشكراكرد و بەپێی ئامارەكانیش سكاڵاتۆماركردن زیادیكردووە و زیاتر لە 100 سكاڵ لەسەر بەكارهێنانی تەكنەلۆژیا تۆماركراوە.

ئەمڕۆ سێشەممە، رێباز زێوەر مستەفا بەڕێوەبەری راگەیاندن و پەیوەندییەكانى بەرەنگاربونەوەی توندوتیژی دژی ئافرەتان لە هەولێر، رایگەیاند: لە شەش مانگی یەکەمى ئەمساڵدا (30) حاڵەتی سوتان و (20) حاڵەتی خۆسوتاندن و شەش حاڵەتی كوشتنی ژنان و (10) حاڵەتی خۆكوشتن تۆمار کراوەن جگە لە تۆمارکردنى (14) حاڵەتی دەستدرێژی سێكسی و (1846) سكاڵا.

سەبارەت بە یاسای بەرەنگاربوونەوەی توندوتیژی كە شەلتەرەكانی ژنانە ئەوحاڵەتانەی هەڕەشەیان لەسەرە ئەمساڵ (168) ئافرەت رەوانەكراون و (137) حاڵەت چارەسەر كراون و (31) حاڵەتیش لە شوێنی مانەوەدا ماون.

لەبارەی هێلە گەرمەكانی ژمارە (119)ى تایبەت بە  خزمەتكردن بە خێزان کە لە مانگی (10)ی ساڵی رابردوو کەوتوەتە کار، لەماوەی هەشت مانگدا (3149) كەس پەیوەندیان بەو هێڵەوە كردووە كە زانیاری دەرچوونی و یاسایی و هەروەها ئاگاداری هەڕەشەكردن بووە و فریایان كەوتون.

هەر لە ئامارەكەدا ئەوە خراوەتەڕوو؛ لەو حاڵەتانەی كوشتن و خۆكوشتنن هیچیان لەسەر ناموس نەبووە، بەڵكو هۆكاری دیكەی وەك زەوی و زار و بێهۆشی بوون.

دەشڵێت لەهەمان كاتدا رێژەی دەستدرێژی سێكسی لە 23 حاڵەتەوە كەمبووەتەوە بۆتە 14 حاڵەت.