دانیشتووانی شاری ناڤباكوتۆس-ی یۆنانی تووشی شۆك بوون كه‌ بینیان سه‌گێك چه‌نده‌ دڵسۆزی خاوه‌نه‌كه‌یه‌تی، ئه‌مه‌ش وای له‌و خه‌ڵكه‌ كردووه‌ كه‌ هاوسۆزبن و هه‌ر له‌و شوێنه‌ خواردنی پێبده‌ن، كه‌ نزیكه‌ دووساڵه‌ ئه‌و شوێنه‌ به‌جێناهێلێت.

له‌مباره‌یه‌وه‌ پێگه‌ی Greek Reporter هه‌واڵی ده‌ڵێت: سه‌گه‌كه‌ له‌و شوێنه‌ ماوه‌ته‌وه‌ كه‌ له‌ مانگی 11ی ساڵی 2017 خاوه‌نه‌كه‌ی له‌ رووداوێكی هاتوچۆی دڵته‌زین گیانی له‌ده‌ستدا.

هه‌روه‌ها پێگه‌كه‌ ده‌ڵێت: سه‌گه‌ سپییه‌كه‌ له‌و شوێنه‌ جێگیربووه‌ كه‌ كراوه‌ته‌ مۆنۆمێنتێكی یادگاری كه‌ له‌نزیك شوێنی رووداوه‌كه‌ بۆ خاوه‌نه‌كه‌ی دانراوه‌و هه‌رگیز ئه‌و شوێنه‌ جێناهێلێت و له‌كاتی به‌رزبوونه‌وه‌ی پله‌كانی گه‌رماش ده‌چێته‌ به‌ر سێبه‌ری دره‌خته‌كانی ئه‌و ناوچه‌یه‌.

ده‌شڵێت: ئه‌مه‌ش دانیشتووانی ناوچه‌كه‌ی تووشی شۆك كردووه‌ كه‌ چۆن ئه‌م سه‌گه‌ به‌ته‌نیا توانیویه‌تی شوێنی رووداوه‌كه‌ بدۆزێته‌وه‌ كه‌ 12 كلیۆمه‌تر له‌ماڵی خاوه‌نه‌كه‌ی دوور بووه‌ .

وه‌رگێڕان و داڕشتنه‌وه‌ی / رزگار