زیاتر له‌ (55) تۆن كاڵاوشمه‌ك له‌ناوبرا

له‌ پشكنین ده‌رنه‌چوون شیاوی خواردن یاخود به‌كارهێنان نین

له‌راگه‌یاندراوێكدا قایمقامیه‌تى قه‌زای ناوه‌ندی سلێمانى بڵاوی كرده‌وه‌ كه‌ له‌ مانگی رابردوودا، لیژنه‌ هاوبه‌شه‌كانی قائمقامیه‌تی سلێمانی ده‌ستیان به‌سه‌ر بڕێكی زۆر كاڵاوشمه‌كی جۆراوجۆردا گرتووه‌، پاش پشكنینی فیزیایی و كیمیایی بڕیاری له‌ناوبردنیان دراوه‌.


راشیده‌گه‌یه‌نن ، له‌ئه‌نجامی سه‌ردانی لیژنه‌ هاوبه‌شه‌كانی قائیمقامیه‌تی سلێمانی بۆ دوكان و بازاڕ و شوێنه‌ گشتییه‌كان و پشكنین بۆ ئه‌وكاڵاوشمه‌كانه‌ی هاوڵاتیان به‌كاریده‌هێنن، له‌ ‌مانگی ته‌مووزی2019 و به‌هۆی هه‌بوونی گومان لێیان ده‌ستیان به‌سه‌ر بڕی (55) تۆن و (597) كیلۆگرام كاڵاوشمه‌كی جیاوازدا گرتووه‌.


قایمقامیه‌تى قه‌زای ناوه‌ندی سلێمانى ده‌شڵێت ، پاش ره‌وانه‌كردنی نمونه‌ی ده‌ستبه‌سه‌رداگیراوه‌كان بۆ تاقیگه‌كانی به‌ڕێوه‌به‌رایه‌تی ته‌ندروستی و زانكۆی سلێمانی، ئه‌وكاڵاوشمه‌كانه‌ی له‌ پشكنین ده‌رنه‌چوون شیاوی خواردن یاخود به‌كارهێنان نین بۆیه‌ به‌فه‌رمانی قائیمقامی سلێمانی و له‌ناوچه‌ی ده‌ره‌وه‌ی نیشته‌جێبوونی هاوڵاتیان له‌ناوبراون.


له‌كۆتادا رایده‌گه‌یه‌نن ئه‌و خۆراك و مادده‌ ماوه‌به‌سه‌رچووانه‌ی له‌لایه‌ن لیژنه‌كانه‌ هاوبه‌شه‌كانی قائیمقامیه‌تی سلێمانیه‌وه‌ ده‌ستییان به‌سه‌ردا گیراوه‌‌ له‌ (خوارده‌مه‌نی جۆراوجۆر، بۆن و جوانكاری خانمان، مادده‌كانی پاككردنه‌وه‌ و قڕكه‌ری مێرووی خانووه‌ كشتوكاڵیه‌كان، میوه‌كان، خواردنه‌وه‌ گازییه‌كان) پێكهاتوون كه‌ شیاوی خوارن و به‌كارهێنان نه‌بوون و له‌ناوبراون.


دارشتنه‌وه‌ى هه‌واڵ - شوان عه‌زیز