ئه‌مریكا 102 هه‌ژماری تویته‌ری داعشی راگرت

ناو و ناویشانی سه‌رجه‌م هه‌ژماره‌ بلۆككراوه‌كانی ئاشكرا كردووه‌

ئه‌و هه‌ژمارانه‌ هه‌واڵ و چالاكییه‌كانی داعشییان بڵاوكردووه‌ته‌وه‌، له‌پاڵ بڵاوكردنه‌وه‌ی چه‌ندین شتی دیكه‌ی په‌یوه‌ست به‌ تیرۆره‌وه‌، وه‌ك هێزه‌كانی ئه‌مریكا رایانگه‌یاندووه‌.

فه‌رمانده‌ی ناوه‌ندیی هێزه‌كانی ئه‌مریكا (Centcom) رایگه‌یاند كه‌ به‌ڕێوه‌به‌رایه‌تی تۆڕی تویته‌ر 102 هه‌ژماری تویته‌ری سه‌ربه‌ ده‌وڵه‌تی ئیسلامی له‌عێراق و شام ناسراو به‌ "داعش"ی راگرتووه‌.

هه‌ژماری (Report_ISIS) كه‌ سه‌ر به‌و فه‌رمانده‌ییه‌یه‌ و تایبه‌ته‌ به‌ بڵاوكردنه‌وه‌ی هه‌ژماره‌كانی داعش بۆ ئه‌وه‌ی تویته‌ر له‌" پێشێلكارییه‌كان" ئاگادار بكاته‌وه‌، بڵاویكردووه‌ته‌وه‌ توانیویانه‌ 102 هه‌ژماری داعش له‌ تویته‌ر بسڕنه‌وه‌ و بلۆك بكه‌ن پاش ئاگاداركردنه‌وه‌ی به‌ڕێوه‌به‌رایه‌تی تویته‌ر.

فه‌رمانده‌ی ناوه‌ندیی هێزه‌كانی ئه‌مریكا له‌ گرته‌یه‌كی ڤیدیۆیی كورتیشدا ناو و ناویشانی سه‌رجه‌م هه‌ژماره‌ بلۆككراوه‌كانی له‌لایه‌ن تویته‌ره‌وه‌ ئاشكراكردووه‌.