پاریس سانجێرمان گه‌یشته‌ قۆناغی 16ی چامپیۆنس لیگ

یانه‌ پاریسیه‌كه‌ چواره‌م سه‌ركه‌وتنى له‌سه‌ریه‌ك تۆماركرد


شه‌وی رابردوو له‌خولی یانه‌ پاله‌وانه‌كانى ئه‌وروپا یانه‌ی پاریس سانجێرمان به‌ گۆڵێكی بێ به‌رامبه‌ر له‌ یانه‌ی كلۆب بروجی میوانی برده‌وه‌و چواره‌م سه‌ركه‌وتنی له‌سه‌ریه‌كی به‌ده‌ستهێنا

یاریزانانی یانه‌ پاریسیه‌كه‌ به‌ چه‌ندین هێرشی یه‌ك له‌دوای یه‌ك بۆ سه‌ر گۆڵی میوانه‌كه‌یان ده‌ستیان به‌ ڕووبه‌ڕوو بوونه‌وه‌كه‌ كردو له‌ یه‌كێك له‌ هێرشه‌كان و له‌ خوله‌كی بیستویه‌كدا، ماورۆ ئیكاردی ئه‌رژه‌نتینی گۆڵێكی بۆ تیپی میواندار تۆماركرد

دوای ئه‌م گۆڵه‌ش ئه‌نجامی یاری گۆڕانكاری دیكه‌ی به‌خۆوه‌ نه‌بینی و له‌ ئه‌نجامدا پاریس سانجێرمان به‌ گۆڵێكی بێ وه‌ڵام سه‌ركه‌وتنی به‌ده‌ستهێناو كۆی خاڵه‌كانی له‌ پێشه‌نگی ڕیزبه‌ندی گڕوپه‌كه‌ گه‌یانده‌ دوازده‌ خاڵ و ڕاسته‌وخۆ و به‌ شێوه‌ی پێشوه‌خت گه‌یشته‌ قۆناغی شازده‌ی خوله‌كه‌