وه‌زیری ته‌ندروستی: خۆشبه‌ختانه‌ تا ئێستا هیچ حاڵه‌تێكی نه‌خۆشی كۆرۆنا له‌ هه‌رێمی كوردستان تۆمار نه‌كراوه‌

له‌ لێدوانێكی رۆژنامه‌وانیدا 

له‌ لێدوانێكی رۆژنامه‌وانیدا وه‌زیری ته‌ندروستی حكوومه‌تی هه‌رێمی كوردستان له‌ میانی به‌سه‌ركردنه‌وه‌ی سه‌نته‌ری چاره‌سه‌ری كۆرۆنا له‌ هه‌ولێری پایته‌خت رایگه‌یاند: ده‌ستخۆشی له‌ سه‌رۆكی ئه‌نجوومه‌نی وه‌زیرانی حكومه‌تی هه‌رێم ده‌كه‌ین بۆ كردنه‌وه‌ی سه‌نته‌ری چاره‌سه‌ری ڤایرۆسی كۆرۆنا و ئه‌و رێكارانه‌ی كه‌ بۆ رووبه‌رووبوونه‌وی بڵاوبوونه‌وه‌ی ڤایرۆسه‌كه‌ گیراونه‌ته‌به‌ر. 

گوتیشی: خۆشبه‌ختانه‌ تا ئێستا هیچ حاڵه‌تێكی نه‌خۆشی كۆرۆنا له‌ هه‌رێمی كوردستان تۆمار نه‌كراوه‌" وه‌ك پلانی ئه‌ی، ئه‌م نه‌خۆشخانه‌یه‌مان كردووه‌ته‌وه‌ كه‌ 60 قه‌ره‌وێله‌ی تێدایه‌. 

ئاشكراشی كرد: له‌ 24 كاتژمێری رابردوودا، 14 نموونه‌مان له‌و ڤایرۆسه‌ ره‌وانه‌ی ئه‌م نه‌خۆشخانه‌یه‌ كردووه‌، به‌و كیته‌ پشكنینانه‌ی كه‌ له‌لایه‌ن رێكخراوی ته‌ندرووستی جیهانی په‌سه‌ندی كردوون پشكنین ده‌كرێن و به‌ خۆشحاڵییه‌وه‌ 12 حاڵه‌تەكە تووشبوون به‌ ڤایرۆسی كۆرۆنا نه‌بوون و ئه‌گه‌ر حاڵه‌تی دیكه‌ش هه‌بن ئێمه‌ له‌ پشكنینه‌كان به‌رده‌وام ده‌بین.