سەرۆکی ژووری بازرگانی و پیشەسازیی دھۆک: هه‌ركه‌سێك نرخ به‌رز بكاته‌وه‌ لێپرسینه‌وه‌ی له‌گه‌ڵ ده‌كرێت

هاورده‌كردنی شتومه‌ك ئاسایی بووه‌ته‌وه‌

زیاتر له‌ هه‌فته‌یه‌كه‌ بازاڕه‌كانی هه‌رێمی كوردستان جوڵه‌یان تێكه‌وتووه‌ته‌وه‌ هه‌رچه‌نده‌ ئه‌و بازاڕه‌ نییه‌ بۆ فرۆشیاران وه‌ك سه‌رده‌می پێش كۆرۆنا به‌ڵام ڕەوشی بازرگانی بەرەو ئاساییبوونەوە دەچێت، جگه‌ له‌ لێژنه‌كانی قایمقامیه‌ت ژووره‌ بازرگانییه‌كانیش چاودێری بازاڕ ده‌كه‌ن سەرۆکی ژووری بازرگانی و پیشەسازیی دھۆک ده‌ڵێت ھەرکەسێک دەستکاریی نرخ بکات سزا دەدرێت. ئەیاد حەسەن، سەرۆکی ژووری بازرگانی و پیشەسازیی دھۆک، بە كوردستان تیڤی ڕاگەیاند: بازاڕه‌كان جوڵه‌یان تێكه‌وتووه‌ته‌وه‌ و تاڕادیه‌ك ئاسایی بوونه‌ته‌وه‌، چونکە حکوومەتی ھەرێمی کوردستان ئاسانکاریی زۆری بۆ جووڵەی بازرگانی کردووە و قەغەدەغەی ھاتوچۆش تا ڕادەیەک ھەڵگیراوە، بەتایبەتی لە دەروازە سنوورییەکان وەک پێشوو کەلوپەل ھاوردەی ھەرێمی کوردستان دەکرێن، تەنیا ڕێنماییی خۆپارێزی جێبەجێ دەکرێن. ده‌شڵێت: ئەگەر قەدەغەی ھاتوچۆ بە یەکجاری ھەڵگیرا ئەوکات بازاڕ وەک پێش ھاتنی ڤایرۆسی کۆرۆنا ئاسایی دەبێتەوە و ھیچ کێشەیەک لەبەردەم بازرگانان نامێنێت، بەتایبەتی بازاڕی ناوخۆ چەند ڕۆژێکە بەھۆی نزیکبوونەوەی جەژنی ڕەمەزان و کەمبوونەوەی کاریگەرییەکانی کۆرۆنا جووڵەی کردووە. له‌باره‌ی كۆنتڕۆڵی نرخی شتوومه‌ك له‌ بازاڕه‌كان ئه‌و به‌رپرسه‌ی ژووری بازرگانی و پیشه‌سازی دهۆك ڕایگه‌یاند: به‌هیچ شێوه‌یه‌ك ڕێگه‌ ناده‌ین بازرگانان و فرۆشیاران نرخ به‌رز بكه‌نه‌وه‌ چونكه‌ ئێستا دۆخه‌كه‌ وه‌ك پێش كۆرۆنا ئاسایی بووه‌ته‌وه‌ له‌ هاورده‌كردنی كه‌لوپه‌ل و هه‌موو شتێك هه‌یه‌ بۆیه‌ پێوست ناكات به‌ بیانووی نه‌بوونی كه‌لوپه‌ل نرخ به‌رز بكرێته‌وه‌ ته‌نیا چه‌ند شتێك نه‌بێت كه‌ له‌شوێنی هاورده‌كراو گران بووه‌.