گەشتووگوزاری هەولێر چەند بڕیارێکی نوێی دەرکرد

سەرجەم کافتریا و ڕێستۆرانت و مەیخانەکانیش دەکرێنەوە

دوای هەڵگرتنی قەدەغەی هاتووچۆ بەڕێوەبەرایەتی گشتی گەشت و گوزاری هەولێر چەند بڕیار و ڕێنماییەکی نوێی بۆ بنکە و شوێنە گەشتیارییەکان بۆ خۆپاراستن لەڤایرۆسی کڕۆنا دەرکرد.

شوکر عەزیز، جێگری سەرۆکی کۆمەڵەی میوانخانە و چێشتخانەکانی هەولێر بە کوردستان تیڤی ڕاگەیاند: کۆبوونەوەکە لەپێناو گرتنەبەری ڕێنمایی و جێبەجێکردنی لەلایەن شوێنەگەشتیاری و ڕێستۆرانت و مەیخانەکانە کەتێیدا ژمارەیەک بڕیاری گرینگ دەرکران کە خۆی لەچەند خاڵێک دەگرێتەوە.

ئاماژەی بەوەشدا:" هیوادارین کە خاوەنی سەرجەم ئەو شوێنانەی ناومان برد لەگەڵ ئەو گەشتیار و هاوڵاتیانەی سەردانی ئەو شوێنانە دەکەن پابەندی ڕێنماییەکان بن بۆ سەلامەتی گیانی خۆیان و هەمووان.

لەبڕیار و ڕێنماییەکانی دەستەی گەشتووگوزاری هەولێردا هاتووە:

1- هەڵواسینی ڕێنماییه‌كانی ده‌رچوو له‌وه‌زاره‌تی ته‌ندروستی ده‌رباره‌ی چۆنییه‌تی خۆپاراستن له‌ ڤایرۆسی كۆڕۆنا له‌ بنكه‌ گه‌شتیارییه‌كان.
2- قەدەغەکردنی کێشانی نێرگه‌له‌ بەهەموو شێوازێک له‌ ده‌ره‌وه‌و ناوەوەی بنكه‌ گه‌شتیارییەکان.
3- قەدەغە کردنی ئاهه‌نگ گێڕان ولایڤ موزیك به‌هه‌موو شێوه‌یه‌ك .
4- كه‌م كردنه‌وه‌ی ژماره‌ی كورسی پێویسته‌ بۆ هه‌ر مێزێك له‌چوار كورسی زیاتر نەبێت.
5- كه‌م كردنه‌وه‌ی ژماره‌ی مێز بەشێوازێک دوری نێوان دوو مێز له‌سێ مه‌تر كه‌متر نه‌بێت.
6- به‌كارهێنانی پێداویستی سەفەری کەبۆ یەک جار بەکاردێت جگە لەبنکە گەشتیارییەکانی پێنج و چوار ئەستێرە.
7- پۆشینی سه‌ر مێزه‌كان به‌كاغه‌زی سه‌فه‌ری یان(نایلۆنی سه‌فه‌ری) و گۆڕینیان بەبەردەوام.
8- كردنه‌وه‌ی ده‌رگاو په‌نجه‌ره‌كان به‌شێوه‌یه‌كی به‌رده‌وام.
9- زیادكردنی ئامێری هه‌وا گۆڕكێ كاركردنیان به‌به‌رده‌وامی.
10- ته‌عقیم كردنی ڕۆژانەی سه‌رجه‌م شوێنه‌كان بەبەردەوام.
11- به‌كار نه‌هێنانی مینیۆی خواردن(Menu) . 
12- پاك ڕاگرتنی ده‌ست شۆرەکان و دانانی کەسێک بۆ خاوێن کردنەوەو ته‌عقیم كردنیان به‌شێوه‌یه‌كی به‌رده‌وام.
13- ڕێگه‌ نه‌دان به‌هیچ کەسێکك بۆ چونە ژوره‌وه‌ی بنکە به‌بێ به‌ستنیی ماسك و پەنجەوانە.
14- پێویسته‌ كارمه‌ندانی بنكه  به‌به‌رده‌وام ماسك و پەنجەوانە ببەستن.
15- ته‌عقیم كردنی به‌رزكه‌ره‌وه‌(مصعد) لەبنکە گەشتیارییەکان به‌شێوه‌یه‌كی به‌رده‌وام.
16- به‌كارهێنانی باخچه‌كانی بنكه‌ بۆ دانیشتنی مێوانەکان.
17- دوایین کات بۆکردنەوەی بنکەکان تاوەکو کاتژمێر(1)ی شەو دەبێت.
18- بەکارنەهێنانی سیستەمی (Valet Parking Service) بۆ ڕاگرتنی ئۆتۆمبێل.
19- دانانی به‌ربه‌ست و جیاكه‌ره‌وه‌ له‌نیوان میوان و (كاشێر.پێشوازی) بەپێی پێویست
20- له‌كاتی جێ به‌جێ نه‌كردنی هه‌ر بڕگه‌یه‌ك له‌بڕگه‌كانی سه‌ره‌وه‌  بنكه‌ توشی سزای یاسایی ده‌بێت.