شاندێکی بازرگانی تورکیا سەردانی ھەرێمی کوردستان ده‌كه‌ن

بڕیارە سبەی، شاندێکی بازرگانیی تورکیا سەردانی ھەرێمی کوردستان بکات و زنجیرەیەک دیداری بازرگانی ئەنجام بدات.

لەمبارەیەوە بەڕێوەبەری راگەیاندن لە لقی ھەولێری یەکێتیی ھاوردە و ناردنکارانی ھەرێمی کوردستان، ھێرش سادق  راگەیاندووه‌ سبەی شاندێکی بازرگانی کە پێکھاتوون لە کۆنسولخانەی تورکیا لە ھەولێر، دەستەی گومرکی تورکیا و نوێنەری وەزارەتی بازرگانیی تورکیا سەردانی لقی ھەولێری یەکێتیی ھاوردە و ناردنکارانی ھەرێمی کوردستان دەکەن.

ناوبراو ئاماژه‌ی به‌وه‌شكردووه‌، ئامانجی سەردانەکە توندو تۆڵکردنی پەیوەندییە بازرگانییەکانە، بەتایبەت کە لە ماوەی رابردوودا، بەھۆی ڤایرۆسی کۆرۆنا و رێوشوێنە تەندروستییەکان، كه‌مێك سستی کەوتبووە کەرتی بازرگانی و زۆرترین بازرگانیمان لەگەڵ ئەو وڵاتەدا ھەیە، بۆیە سبەی شاندەکە دوایین پێشھاتە بازرگانییەکان تاوتوێ دەکات.

بەڕێوەبەری راگەیاندن لە لقی ھەولێری یەکێتیی ھاوردە و ناردنکارانی ھەرێمی کوردستان  ده‌شڵێت تورکیا ھەندێک ئاسانکاری بۆ بازرگانانی ھەرێمی کوردستان کردووە کە ئێستا بازرگانان دەتوانن بە ناسنامەی یەکێتیی ھاوردە و ناردنکارانی ھەرێمی کوردستان و بە ئۆتۆمبێلی خۆیان سەردانی تورکیا بکەن، لەم سەردانەشدا کۆمەڵێک ئاسانکاری دیکەی ھاوشێوە دەکرێت.