لەم ھەفتەیە كاروانێكی دیكەی ڤاكسین دەگاتە ھەرێمی كوردستان

به‌رێوه‌‌به‌ری گشتیی ته‌ندروستی هه‌ولێر رایگه‌یاند: كاروانی داھاتووی ڤاكسین بەشێكی دەدرێت بە قەزاكانی كۆیە و سۆران.

له‌ لێدوانێكی تایبه‌ت به‌ كوردستان تیڤی دكتۆر دلۆڤان محه‌مه‌د به‌رێوه‌‌به‌ری گشتیی ته‌ندروستی هه‌ولێر رایگه‌یاند: لەم ھەفتەیە كاروانێكی دیكەی ڤاكسینی سینۆفارم دەگاتە ھەرێمی كوردستان، ھەروەھا ھەفتەی داھاتوو كاروانێكی دیكەی ڤاكسینی فایزەر دەگات، كە ھەزار و سه‌د و حه‌فتا ژەم ڤاكسینە.

روونیشیكردەوە: ھاتنی ڤاكسینی فایزەر بۆ ھەرێمی كوردستان بە ماوەی ھەشت ھەفتە دەبێت، سەنتەری رزگاری لە ھەولێر، لە ماوەی ئەم ھەشت ھەفتەیە شەش جار وەریدەگرێت، ئێستا كاروانێكی وەرگرتووە و تەواو ڤاكسینەكان بەكارھێنراون.

بەڕێوەبەری تەندروستیی ھەولێر، باسی لەوەشكرد: لە كاروانی داھاتووی ڤاكسین بەشێكی دەدرێت بە قەزاكانی كۆیە و سۆران.

ئاماژەی بەوەشكرد: بە گشتی لە سنووری پارێزگای ھەولێر نۆزده‌ ھەزار و پێنجسه‌د ژەم ڤاكسین بەردەست بوو، نزیكەی پازده‌ ھەزار ژەمی بەكارھێنراوە و پرۆسەكە بەردەوامە.

ئاشكراشی كرد: ڤاكسینی ڤایزەر داواكاری زیاتری لەسەر بوو لە ھەمانكاتدا بڕەكەشی كەمتربوو، بۆیە ئێستا لە ھەولێر نەماوە، تەنھا كەمێك لە سۆران ماوە.