پاسۆردێ‌ كوردینێ‌ هاته‌ هه‌لبژارتن!

شه‌ڤ و رۆژ ل ده‌ف وی نه‌مان ژ به‌ر به‌رده‌وام هه‌ولێن چاره‌سه‌ركرنا قه‌یران و ئاریشێن مه‌زن خۆشی ب ژیانا خوه‌ نه‌ما
Thumbnail

 هه‌می كلیل ناكه‌ڤنه‌ هه‌مه‌ ده‌رگه‌هان، ب تنێ‌ هه‌كه‌ بهێنه‌ خه‌وارزمیكرن و نه‌ماره‌كرن و پاسۆره‌كێ‌ جێواز بۆ بهێته‌ دانان، ئه‌ڤجا هه‌كه‌ مرۆڤ نه‌زانیت بۆ خوه‌ كلیلا دروست ژێ‌ بگریت و بهه‌لبژێریت، دێ‌ مینیته‌ ل به‌ر ده‌رگه‌هی ل به‌ر سه‌رما و گه‌رما و ره‌حما سه‌قایێ‌ دونیایا ژ ده‌رڤه‌، به‌لكو دێ‌ مینیته‌ بێ‌ ستاره‌ و خه‌لك دێ‌ حه‌نكان ب مرۆڤی كه‌ن!. ئه‌ڤجا ئه‌وكه‌سێ‌ هاتیه‌ هه‌لبژارتن ب بۆچوونێن پتریا ده‌نگێن وه‌لاتێ‌ مه‌ (هه‌رێما كوردستانێ‌) ل ناڤا په‌رله‌مانێ‌ مه‌ دا، كو كه‌سێ‌ نێچیرڤان بارزانی یه‌، ته‌ڤلی گه‌له‌ك تاقیكرنێن هوور و توند بوویه‌، حه‌تا شیایی ڤی پاسۆردێ‌ كوردینیێ‌ بدانیت و هه‌می ده‌رگه‌هان پێ‌ ڤه‌كه‌ت! ئه‌ڤجا كلیلا ده‌رگه‌هێ‌ مالا كوردی و یا ده‌ڤه‌رێ‌ یا د ده‌ستان دا و دزانیت!، هه‌كه‌ نه‌، كه‌سێ‌ ژ مه‌ ژ نویكا خوه‌ فێركه‌ت كا چاوا و كیژ كلیل دگه‌ڤیتێ‌، ئه‌م دێ‌ بێزار بین، یان هیڤیا ژ خه‌لكی كه‌ین بۆ مه‌ ده‌رگه‌هی بشكێنن و ب بێسه‌روبه‌وری بچینه‌ ژۆر!!. ئه‌ڤجا ما چیه‌ ئه‌ز و تو هه‌ما بژارده‌یا راست و دروست هه‌لبژێرین؟!

لۆتكه‌یا خۆشیێ‌ ژ ناڤا نه‌خۆشیان دهێته‌ به‌رهه‌مئینان، له‌ورا ژی ده‌رئه‌نجامێ‌ ده‌رده‌سه‌ری و جینۆسایدێن ئه‌نفال و قركرن ژناڤبرن و كۆمكۆژی و نه‌هامه‌تی و به‌رزه‌كرن و ده‌ربده‌ری و تێكۆشان و خه‌بات و خۆراگری و برس و ترس و هه‌تا ئه‌ڤرۆ ژ هه‌موو سه‌ربۆران، ل سه‌ر هه‌ڤ خرڤه‌بوون هه‌مبه‌ری گه‌لێ‌ مه‌ یێ‌ كورد، هه‌موو ب هه‌موو ب هه‌ڤرا بوونه‌ نشیڤی حه‌تا ئه‌ڤرۆ ئه‌م گه‌هشتینه‌ ڤی ئاستێ‌ بریارانا مافێ‌ خوه‌ یێ‌ چاره‌نڤیس. ئه‌ڤرۆ ژی ژ ره‌حما ڤه‌رێژا وان هه‌موو ده‌رده‌سه‌ریان نه‌خاسمه‌ یان ڤان هه‌ر پێنچ سالێن دووماهیێ‌ یێن ب هه‌موو جۆرێن مه‌ترسیێ‌ ڤه‌ ب سه‌ر گه‌لێ‌ مه‌ دا هاتین، مه‌ زانی ئه‌م ب خودانین!!.

مرن گه‌هشته‌ ده‌ڤێ‌ مه‌ چونكو دوژمن زۆرێ‌ مه‌زن بوو، ئه‌ژده‌هاكێن مه‌زن دئینته‌ بیرا مه‌ كو ل دووماهیێ‌ كاوه‌یێ‌ ئاسنگه‌ر دبیته‌ زه‌رۆره‌ته‌ك و مه‌ ژ ڤان هه‌می دوژمنێن هۆڤ قورتال بكه‌ت، كه‌سێ‌ نێچیرڤان بارزانی ب رۆلێ‌ باب و برا و سه‌میانێ‌ گه‌لێ‌ خوه‌ رابوو، ب وه‌حیه‌كا نه‌رم ئه‌م ژ ناڤ ئالۆزیێن وان هه‌ره‌شه‌یێن هندێن مه‌زن ئیناینه‌ ده‌ر، ل ده‌مه‌كی كو كه‌س نه‌ما دۆست و هه‌ڤالێ‌ مه‌، هه‌ر ژیێ‌ مه‌ پشتا خوه‌ پێ‌ گه‌رم دكر، پشتا خوه‌ دامه‌ و به‌لكو ئه‌و ژی بوو هه‌ڤدوژ!.

ب راستی وه‌كو من بهیستی شه‌ڤ و رۆژ ل ده‌ف وی نه‌مان ژ به‌ر به‌رده‌وام هه‌ولێن چاره‌سه‌ركرنا قه‌یران و ئاریشێن مه‌زن خۆشی ب ژیانا خوه‌ نه‌ما ژ به‌ر وان هزرێن قه‌له‌قێ‌ ل سه‌ر گه‌لێ‌ خوه‌ و چاره‌نڤیسێ‌ وان، نێزیكی 100 سه‌بۆرێن دپلۆماسی ل گه‌ل مه‌زنه‌ به‌رپرس و ه‌لاتێن مه‌زن هه‌بووینه‌ حه‌تا كو شیایی مه‌ بسه‌ربێخیت، ل دووماهیێ‌ ژی مه‌ دیت، ئه‌وێن هه‌ڤدژیا هه‌رێما كوردستانێ‌ دكرن ژ رێكخراوێن تیرۆرستی یێن مینا داعشێ‌ بگره‌ حه‌تا كو دگه‌هیته‌ وه‌لاتێن شه‌ر ئینایه‌ سه‌ر سنۆرێ‌ مه‌ بگره‌ چ لێهاتن؟! و گه‌هشتنه‌ چ ئه‌نجام ئه‌م یێن وان دبینین و ئه‌م یێن ره‌وشا خوه‌ دبینین!!. كو د لۆژیكا راستیێ‌ دا هه‌ر راستی بسه‌ر دكه‌ڤیت، وه‌كو بابوباپیرێن مه‌ نیشا مه‌دای كو : راستۆ درستۆ .. خارۆ شكه‌ستۆ...

ئه‌م یێن د پاپۆره‌كا به‌رزه‌ دا ل نیڤا ده‌ریایه‌كێ‌ نه‌دیار، هه‌كه‌ مه‌ قومتانه‌ك نه‌بیت، كی دێ‌ (زانیت و كاریت) بهاژۆت به‌ره‌ف كنارێ‌ ئارام مه‌ بگه‌هینیت .. كیلیلا نه‌ته‌وه‌بوونێ‌ د ده‌ستان دایه‌ و پاسۆردا كوردینیێ‌ ئه‌و باشتر دزانیت. دمینیته‌ ل وێرێ‌ ئیراده‌كا پۆلای ژ ره‌حما گه‌ل و هێزا پێشمه‌رگه‌ی، ئه‌ڤ ئیراده‌ مه‌ دیت دوهی و ئه‌ڤرۆ ل ناڤا هۆلا په‌رله‌مانێ‌ هه‌رێما كوردستانێ‌، و ئه‌و سه‌ركرده‌ هه‌لبژات ب زۆرینه‌یا ده‌نگان ب 68 ده‌نگێن نوونه‌رێن مه‌ ژ سه‌رجه‌مێ‌ 81 په‌رله‌مانتاران، كو رێزدار نێچیرڤان بارزانی هاته‌ هه‌لبژارتن وه‌كوسه‌رۆكه‌كێ‌ هه‌لبژارتی.

ئێدی كوردستان ب خودان كه‌فت پشتی ده‌مه‌كی كو سه‌رۆك و مه‌رجه‌عێ‌ گه‌لێ‌ كورد مسعود بارزانی د پێنگاڤه‌كا زانا و هه‌داربوون دا ده‌ست ژ كاری ڤه‌كێشای بۆ به‌رژه‌وه‌ندیا گه‌لێ‌ كورد و پرۆسا سیاسی یا هه‌رێمێ‌، نها ژی هه‌مان میراتكارێ‌ كارێزما هات دا خالان دابنیته‌ سه‌ر په‌یڤان و ب چرایێ‌ زانابوونا خوه‌ ڤی خه‌لكی ژ تاریێ‌ ببه‌ته‌ رۆناهیێ‌َ, ئه‌و كه‌سێ‌ تاریشكێن، داعشێن، قه‌یرانشكێن دێ‌ بیته‌ سه‌میان و سامانێ‌ گه‌لێ‌ مه‌ و ب وێ‌ سه‌رده‌ریا نه‌رم دێ‌ گه‌له‌ك ئاریشه‌یێن ده‌ڤه‌رێ‌ چاره‌سه‌ر بن و ئێدی چار سالێن ب خودان مه‌ گه‌ره‌نتیكرن. ب هیڤینه‌ ببیته‌ به‌رێ‌ بنیاتێ‌ بهێزێ‌ مافێ‌ مه‌ یێن چاره‌نڤیس.