لەگەڵ ئەوەی ئەمڕۆ حکومەتی هەرێمی كوردستان هەنگاوی بەرچاوی ناوە وەکو ئامادەکاری بۆ لە دایكبوونی قەوارەیەکی سەربەخۆ، کە هەموو بەرپرسیارێتیەکان بگرێتە ئەستۆ لە پێناو دەستەبەرکردنی خواست و هیواکانی گەلی کوردستان و ژیانێکی پڕ ئازادی و شکۆمەندی لە چوارچێوەی ئەو سەربەخۆییە، دەکرێت بە ڕاشەکاوی ئاماژە بە قۆناغی مێژوویی خەباتی گەلەکەمان، کە پشت بەست بە هێزی لەبن نەهاتووی پێشمەرگە قارەمانەکان بێ ووچان بۆ ئازادی و بەدەستهێنانی مافەکانی تێکۆشیوە.
گەلی كوردستان و سەرکردایەتی سیاسی بە بەرزڕاگرتنی بەها مرۆییەکانی پەیوەست بە لێبووردەیی و کرانەوە و دادپەروەری کۆمەڵایەتی و یەکسانی تەکەز لەسەر مافی چارەنووس دەکەن، پێيان وایە كوردستان بە هەبوونی ئابوریەکی بەهێز و دامەزراو لەسەر بنەمای زانیاری سەردەم و بە ڕێبەرایەتی کەرتی تایبەتی نیشتمانپەروەر دەتوانێت ئاشتی و سازان لەگەڵ وڵاتانی دراوسێ بونیاد بنێت و لەناو کۆمەڵگەی نێودەوڵەتی ڕۆڵی ئەرێنی و بەرجەستە بگێڕێت.
حکومەتی هەرێمی كوردستان بونیادنانی ئایندە، کە سەربەخۆیی لەگەڵ خۆی دەهێنێ، بە پرۆژەیەكی ستراتیژ دادەنێ و بە سوودوەرگرتن لە دەرفەتەکان کار دەکات لە پێناو زاڵبوون بەسەر ئالنگاریەکان.
خواستەکانی گەلی کوردستان مەزنن، ئەو ساڵانەی، کە کوردستان ناسەقامگیربوو و دەسەڵاتی ناوەند خاکی كوردستانی کردبووە گۆڕەپانی داگیرکاری و ململانێ بەربەستی زۆریان بۆ پەرەپێدان و گەشەسەندن درووستکردبوو. سیاسەتەکانی ستەمکاری و داگیرکاری نەیانتوانی گەلی كوردستان لە خەون و خواستە مەزنەکانی دابڕێنن.
لە ماوەی کەمتر لە دوو دەیەی حکومەتی هەرێمی كوردستان بە پێی پلانی گشتگیر کاری بۆ ژێرخانێکی تۆکمە کردووە و لە ڕێگەی چاکسازی و پەرەپێدان توانیویە دامەزراوە فەرمیەکان و کەرتی تایبەت بەهێزتر بکات.
ڕوانگەی سەرەکی نەخشەسازییەکانی حکومەت لە چوارچێوەی پەرەپێدانی کۆمەڵایەتی و ئابوری بۆ دابینکردنی ئایندەیەکی پڕ ئاسایش و سەقامگیر و گەشەسەندوو بووە بۆ هاوڵاتیانی كوردستان.
ئەمەش دوا ئامانجی حکومەت نیە، چونکە سیاسەتی نیشتمانی گشتی بریتیە لە نوێکردنەوەی سەرجەم سیستەمەکانی پەیوەست بە ئابوری و خوێندن و پەروەردە و تەندروستی و ڕۆشنبیری و کۆمەڵایەتی و هاوەڵیکردنی سەردەمی تەکنەلۆژیای زانیاری بەهەموو ئامراز و کەرەستەکانی.
حکومەتی هەرێمی كوردستان بەهێزکردنی هەستی نیشتمانی و دەستەبەرکردنی یەکگرتوویی لە نێوان هەموو پێکهاتە نەتەوەیی و ئاینیەکان بە ئەرکی سەرەکی خۆی دەزانێت .
کرانەوە بە ڕووی فەرهەنگەکان و وەبەرهێنان لە بواری دامەزراندنی تۆڕی پەیوەندی نێودەوڵەتی پتەو و بەردەوام لەگەڵ ئەندامانی کۆمەڵگەی نێودەوڵەتی دەتوانێ دامەزراوە دیبلۆماسیەکانی كوردستان بەهێزتر بکات.
کابینەی نۆیەمی حکومەتی هەرێم گرینگی بە ڕەهەندەکانی میکانیزمی کارکردنی حکومەت و بونیادنانی تواناکان و ئاراستەی ئایندە دەدات و بە کردەیی بەرجەستەی کردووە، کەوا بەردەوامبوونی لەسەر پاڵپشتیکردنی بەرنامە و پرۆژەکانی کۆمەڵگەی مەدەنی بە مەبەستی هاندانی بۆ پاراستنی مافی مرۆڤ و ڕۆلگێران وەکو چاودێر و درووستکردنی ژینگەیەکی سەقامگیر، دەتوانێ متمانەی هاوڵاتیان و وەبەرهێنەران زیاد بکات، بەو شێوەیە ئایندەیەکی گەش و پڕ سەروەری بەدەست دەهێنرێت.
پێویستە ستراتیژی داهاتوومان بۆ بونیادنانی نموونەکانی ئایندەسازی بێت بە تایبەتی لە کەرەتەکانی تەندروستی (دوای بڵاوبوونەوەی پەتای کۆرۆنا، کۆڤید ١٩) و خوێندن و کۆمەڵایەتی و پەرەپێدان و ژینگە و گونجاندنی حکومەتی ئێستا، بێجگە لە ڕاهێزانی توانا نیشتمانیەوکان لە بواری سەرپەرشتیکردنی ئایندە و بەستنی هاوبەشی نێودەوڵەتی و پەرەپێدانی تاقیگە تایبەتمەندەکان و ئامادەکردنی ڕاپۆرتی توێژینەوەی زانستی سەبارەت بە ئایندە لە کەرتە جیاجیاکانی هەرێمی كوردستان.
دکتۆر سامان سۆرانی
پسۆڕی پەیوەندیە نێودەوڵەتیەکان
