سۆندار پێچای سەرۆکی جێبەجێکاری کۆمپانیای گوگڵ ڕایگەیاند کە ژمارەی بەکارهێنەرانی مانگانەی زیرەکی دەستکردی جێمینای (Gemini) بەربەستی 1 ملیار بەکارهێنەری تێپەڕاندووە. ئەم ڕاگەیاندنەش تەنها هەفتەیەک دوای ئەنجامدانی گۆڕانکاریی بنەڕەتی و دووبارە ڕێکخستنەوەی بەشی زیرەکی دەستکرد لە ناو کۆمپانیا زەبەلاحەکەی تەکنەلۆژیادا دێت.
سۆندار پێچای لە هەژمارە فەرمییەکانی خۆی لە تۆڕە کۆمەڵایەتییەکان ئاماژەی بەوە کردووە کە جێمینای خێراترین بەرهەمی گوگڵە لە ڕووی گەشەکردنەوە لە مێژووی کۆمپانیاکەدا، هەروەها بووەتە 14ـەمین بەرهەمی گوگڵ کە ژمارەی بەکارهێنەرانی بگاتە 1 ملیار کەس. ئەم دەستکەوتە وەک سەرکەوتنێکی گەورە بۆ گوگڵ ئەژمار دەکرێت لە کاتێکدا کە کۆمپانیاکە لە ململانێیەکی تونددایە بۆ سەلماندنی پێگەی خۆی لە بواری زیرەکی دەستکرددا.
سەرەڕای زیادبوونی ژمارەی بەکارهێنەران، گوگڵ هێشتا مۆدێلە پێشکەوتووەکەی بە ناوی (Gemini 3.5 Pro) بڵاو نەکردووەتەوە، کە سەرەتا بڕیار بوو لە مانگی حوزەیرانی ڕابردوودا بخرێتە بازاڕەوە. ئەمە لە کاتێکدایە کە کۆمپانیا ڕکابەرەکان مۆدێلی زۆر بەهێزیان ڕاگەیاندووە، بە تایبەت لە بواری دروستکردنی کۆدی پڕۆگرامسازی کە لە ئێستادا بە یەکێک لە پڕداهاتترین و گرنگترین بوارەکانی زیرەکی دەستکرد دادەنرێت.
ئەم هەڵکشانە خێرایەی ژمارەی بەکارهێنەرانی جێمینای نیشانەی متمانەی بەکاربەرانە بە خزمەتگوزارییەکانی گوگڵ، بەڵام هاوکات بەرپرسیارێتییەکی قورستریش دەخاتە سەر شانی کۆمپانیاکە بۆ خێراکردنی پەرەپێدانی مۆدێلە نوێیەکانی تاوەکو لە کێبڕکێی جیهانی دانەبڕێت.