هێشتا دوو سال ب سه‌ر ریفراندۆما سه‌رخوه‌بوونا هه‌رێما كوردستانێ و روودانێن پشتى 16ى ئكتۆبه‌رێ ده‌ربازنه‌بووینه، هه‌موو ئه‌و سه‌ركرده‌یێن بیانیێ تا سه‌ر هه‌ستى ل دژى هه‌رێما كوردستانێ د ئاخفتن؛ نها ئه‌م وان ل هه‌ولێرێ دبینین.
هێشتا گه‌لێ كوردستانێ ب هه‌یه‌جانا بیرهاتنێن رۆژا ریفراندۆمێ به‌ره‌ف سالرۆژا وێ و مه‌ها ئیلۆنێ دچیت؛ ئه‌م ئالایێ كوردستانێ ل وان وه‌لاتان دبینین كو ل ده‌ما ریفراندۆمێ دا گه‌فا نه‌هێلانا هه‌رێما كوردستانێ دكرن و رۆژانه هێزێن خوه یێن سه‌ربازى ل سه‌ر سنورێ هه‌رێما كوردستانێ نیشان ددان، ژبۆى كو گه‌فێ بكه‌ن و ترسێ د دلێ گه‌لێ كوردستانێ دا دروست بكه‌ن.
لێ ئه‌ڤه هه‌موو نه‌شیا ئیرادا گه‌له‌كێ بشكێنێت كو خوه‌دان سه‌ركرده و رێبه‌رێن كاریزما و دووربینن، باشترین نموونه‌ژى سه‌ره‌دانا وه‌زیرێ ده‌رڤه‌یێ ئیرانێ شانده‌كا مه‌زن ل ده‌ما بۆرى و سه‌ره‌دانا وه‌زیرێ ده‌رڤه‌یێ توركیا ژى ل داوییا مه‌ها نیسانێ، كه‌واته دێ پرسین كى ئه‌ڤه نه‌چاركرن د گۆپیتكا گه‌فكرنێ دا بگه‌هنه وى ئاستێ ل هه‌ولێرێ ل ژێر ئالایێ كوردستانێ دابنیشن؟
بێگومان وێ سیاسه‌تا نه‌رم و لۆژیكیا حكومه‌تا هه‌رێما كوردستانێ بوو، سه‌ركه‌فتنا دبلۆماسیه‌تا نێچیرڤان بارزانى ل هه‌مبه‌ر وه‌لاتێن دژه كوردستانێ ل ڤێرێ دیار دبیت كو هێشتا ئه‌و ل سه‌ر ده‌ستهه‌لاتداریا خوه یا سه‌رۆكاتیا حكومه‌تا هه‌رێما كوردستانێ به‌رده‌وامه، ئه‌و هه‌موو دژمن و نه‌یارێن خوه ل ئاڤاهیا حكومه‌تا هه‌رێمێ دبینیت.
ئیدى گه‌له‌ك لۆژیكیه، ئه‌م پرسیاره‌كا دى ژى بكه‌ین: كى پێدڤى ب كیه؟ ته‌ماشه‌ى ڤان هه‌موو گهۆرینێن ده‌ڤه‌رێ بكه‌ن، بخوه دێ گه‌هنه وێ راستێ كو تاكه بژارده بۆ توركیا و ئیران، بازارێن هه‌رێما كوردستانێ و سامانێن وێ یێن سروشتى یه، چونكى د ڤان سالێن بۆرى یێن ده‌ستهه‌لاتداریا نێچیرڤان بارزانى د پۆستێ سه‌رۆكێ جڤاتا وه‌زیران دا، شیا بیاڤێ ژ بۆ كۆمپانیێن ده‌رئینانا په‌ترۆڵێ و وه‌به‌رهێنانێ خوه‌ش بكه‌ت كو هه‌رێما كوردستانێ د بازارێن جیهانێ بكه‌ته ناڤ و ژماره.
كه‌واته ئه‌گه‌ر بهێته گۆتن كو توركیا و ئیران نه‌چارن ژ به‌ر سزا و گه‌فێن ترامپى خوه نزیكى بازارێن هه‌رێما كوردستانێ بكه‌ن، راست نینه، چونكى سه‌ره‌راى هه‌موو وان دوژمنداری و هه‌لوێستێن توند یێن توركیا و ئیران ل هه‌مبه‌رى هه‌رێما كوردستانێ، لێ دووربینیا نێچیرڤان بارزانى و نه‌رمى نواندنا وى ل هه‌مبه‌ر وێ دژاتیا توركیا و ئیران كو ل وى ده‌مى دهاته كرن، بۆ نها بوو، له‌ورا چه‌ند شاره‌زایى و هێز بۆ سیاسه‌تڤانى گرنگه، سه‌د جاران هنده، دوربینى یا گرنگه. كه‌واته دوور نابینم ئیدى توركیا ب هه‌مان شێوه‌یێ گه‌له‌ك وه‌لاتان رازى ببیت ب ڤه‌كرنا نوونه‌راتییا حكومه‌تا هه‌رێما كوردستانێ ل وه‌لاتێ خوه و ئیدى ب رێكا وێ نوونه‌راتیێ، بزاڤێن ئابوورى و بازرگانى خورتتر ببن.
