دامەزراندنا پارتی دیموکراتی کوردستان نە بتنێ د مێژوویا کوردستان و کوردان دا بەلکی ل دەڤەرێ هەمیێ بوو ئەگەرێ وێ چەندێ گوڕانکاری د تەرازیێ دا پەیدا ببن. ل روژا ١٦ ی ئابا ١٩٤٦ خەباتکەرێن کورد ب سەرکردایەتیا مەلا مستەفا بارزانی بۆ بەردەوامی دان ب خەباتا ڕزگاریخوازیا مللەتێ کورد، پارتی دیموکراتی کوردستان دامەزراندن و دەست ب قوناغەکا نوی هاتە کرن.
پارتی دیموکراتی کوردستان نە بتنێ پارتیەك بی كو سادە و بێ بنەما بت و ل دویڤ داخوازییێن مللەتەکی نە گەڕهت، بەلکی بەروڤاژی، هێزا خوە ژ مللەتی ب خوە وەردگرت و شیا د دەمەك کێم دا پشتەڤانیا مللەتێ کورد ژ هەمی چینان وەرگرت و تێگەهێ ڕزگاریخوازیێ بینت ناڤا خەلکێ دا، ژ لایێ دی ژی ڤە پارتی دیموکراتی کوردستان دامەزراوەکا بتنێ سیاسی نەبی کو حەزێن دەسەلاتێ هەبن و ئیمتیازێ بو خوە وەرگرت بۆ وێ چەندێ هاتە دامەزراندن دا کو مللەتێ کورد ژ بن دەستیێ ڕزگار بکت و هێڤی و ئومێدێن کوردان جیبەجێ بکەت.
پارتی دیموکراتی کوردستان هەرچەندە ل ئێراقێ هاتە دامەزراندن بەلێ ئەڤ پارتیە بوو جهێ پەروەردە کرنا دەهان سەرکردە و دامەزراندنا چەندین چەقان ل وەلاتێن دەوروەبەر ئانکو پێگەهێ پەیداکرنا هزرا نەتەوەیی بوو ل دەڤ کوردێن بن دەستهەلاتا وەلاتێن دی کو هەر کوردستان بی هاتی داگیر کرن.
پارتی دیموکراتی کوردستان وەرچەرخانەکا نوی دروست کر د مێژوویا کوردستانێ دا و ژلایێ کەلتوری و جڤاکی ڤە ژی ڕولەکێ بەرچاڤ هەبی. هەروەسا شیا دەنگ و ئازار و خەبات و شوڕەشا کوردان بگەهینت جیهانێ و جیهانێ ئاگەھ ژ ڤی مللەتی هەبت کو یێن هاتین ستەم لێکرن و زۆرداریا لێ دهێتە کرن تا وی ڕادەی ئێدی جیهانێ ئاگەھ ژ کوردان هەبی و ئێش و ئازارێن وان دگەهشتن ڕایا جیهانێ.
پارتی دیموکراتی کوردستان بوویە قوتابخانەیەك بو کوردان و هەر کوردەکی بێی جیاوازیا ئایین و زمان و نەژاد دشیا خوە تێدا ببینت.
