بێگومان هەمی ئەو پرسێت كو ئەڤرۆ گەنگەشە ل سەر تێنە كرن هندی پرسا پیس بوون و پاراستنا ژێنگەی د گرینگ نینە . ژبەرکوو ئەڤ پرسە توخێبەكێ بەرتەسك یێ جوگرافێ ل خوە نەگرتیە، لێ ل سەر ئاستێ هەمی جیهانێ دانوستاندن و گەنگەشە ل سەر ڤی بابەتی تێنە ئەنجامدان . واتە ئەگەر پرسەك ب ڤی قاسی یا گرینك و تایبەتمەند بیت ئەڤ هەمی گۆپیتک و كونگرە و كونفرانس ل سەر ڤێ مژارێ چما تێنە گرێدان .
نابیت ئەم ل سەر ڤی كارێ گرینگ كو ژیانا مروڤی بەر ب پێشڤە دبەت هاێدار نەبین. پێدڤیە هەلویستەكا مروڤی ل هەمبەر ڤێ پرسا هندە یا گرینك وەربگرین، ژبەرکوو د دەمئ پیسبونا ژینگەی ل هەر جهەکی بیگومان ئەڤ یەک باندۆرا خوە دێ هەبە ل سەر هەمی جهێن دن یێن جیهانێ ، ژبەرکوو پیسبونا ژینگەی چێبوونا جەنگەكێ نییە دناڤبەرا دوو وەلاتان یان ژی دوو ئالیان كو تنێ دەڤەرەكا دیاریكرێ ڤەدگریت، بەلكو پیسبونا ژینگەی هەمی ئەو توخێبێت دەستكردیش دێ بریت كو هەر تاكەكێ سەر عەردی یێ بێ پشك نابێت ل پیسبونا ژینگەی ،مادەم مەترسیا پیسبونا ژینگەی یا بێ توخێبە پێدڤیە سنوورەک ژ بو پیسبونا ژینگەی بێتە دانین ئەڤ چەند ژی بڤێ یەکێ تێ کرن کوو ژ ئالیێ تاكێ جڤاکی ب ئالیکاریا ئالیێن ژینگەپارێز ب هەماهەنگیا هەڤدوو توخێبەكێ بۆ پیسبونا ژینگەی دانین.
پاراستن و پاقژ راگرتنا ژینگەی تنێ ب پەیڤ و دروشمێت بریقەدار نابیت، بەلكو كاركرنەكا پراكتیكی و هوشیاركرنەڤەكا پەروەردەیی و راهێنان بو هەمی وەڵاتیان یا پیدڤێیە، ژبەرکوو ئەگەر پێ نەوەستین وەڵاتیان ژ مەترسیا پیسبونا ژینگەی هایداركەین یا ب زەحمەتە كۆ پیوەستێن پیوەرێت پاك راگرتنا ژینگەی پەیرەو بكەین . لبەر ڤێ چەندێ یا پیتڤێیە كۆ كارلێكرنەكا پوزەتیڤانە هەبێت دناڤبەرا مروڤ و ژینگەیدا ب جورەكێ كۆ پەیوەندیەكا گشتگیر بێت یا پەیوەست نەبێت ب دەم و جهێ دیاری كرێ .
لەوما بۆ خۆ رزگاركرن ژ ڤان هەمی ئاریشەیێن كۆ مروڤ ب دەستێ خۆ ئەنجام ددەت پیدڤیە كۆ گرینگیەكا زور ب بیاڤێ پەروەردە و فێركرنا ژینگەی بهێتەدان وەك تاكێ دناڤ جڤاکی دە و پێ بێتە ئاشناكرن، هەر ئیك ژ مە بۆ خۆ پەروەردەكرن و خۆ رەوشەنبیركرن ل سەر ژینگەی پیدڤی ب ڤان خاڵان یێت هەی .
1- گەشەپێدانا هوشیاریا ژینگەیی یا وەڵاتیان ب ڕێیا دیدا تەندروستی كۆ تەندروستَیەكا باش هەبێت .
2- گەشەپێدان و پێك ئینانا بهایێ ئاراستەكرنا ژینگەیەكێ باش ژ لایێ وەڵاتیان ڤە كۆ پێ بوەستن ب چ ئاوایەکی روبرویێ كاودانێ زەحمەت یێ ژینگەیێ ببنەڤە .
3- پەرەپێدانا شیانێت مروڤان ب بکارئانینا رێ و شوونێت گرینگ و پروگرامێت پەروەردەیێ و فێركرنێ كۆ پەیوەندار بیت ب ژینگەیڤە سەخمەراتێ ب دەست ڤەئینانا پەروەردەكا ژینگەیی یا باشتر .
4- ڤەدێتنا هەڤسەنگیەكا ب هێز دناڤبەرا پێكهاتەیێن جڤاکی و ئابوری و بایەلوجی ژبوو كارتیكرنەكا ژینگەیی كۆ د بەرژەوەندیا مروڤایەتێی دا بێت .
5- تێگەیشتنا سیستەمێ كومەلایەتی و ئابوری و تەكنەلوژی و سروشتی كوو پەیوەندیەكا راستەراست ب ئاریشە و گرفتێت پیسبونا ژینگەی ڤە هەبیت . گرینگی دان ب پاراستنا ژینگەی نیشانا وەفاداریا تاكێ جڤاکیە بو نیشتیمان و ساخلەمیا خو، لەوما پێدڤیە هەر ئیك ژ مە خو ب بەرپرسیارێ سەرەكی بزانیت ب تایبەتی ل بیاڤێ ژینگەپارێزیێ دا . ئەگەر هاتوو مە ژینگەهێ وەلاتێ خو پاراست تێ واتەیا ڤێ یەکێ کوو مە ساخلەمیا خو ب جانترین ئاوا پاراستیە و ژ ئالیێ ئابوری ژی ئەمێ مفایێ ل ژینگەیێ پاقژ و بژوین وەرگرین.
