ئیدى هه‌رێما كوردستانێ ل هه‌مبه‌ر قوتاغه‌كا دى یا گهۆرین و وه‌رچه‌رخانێ یه، ئه‌و ئاماژه‌یێن دهێنه دیتن هه‌موو بۆ وێ یه‌كێ دچن كو بزاڤێن حكومه‌تا هه‌رێما كوردستانێ ب گشتى و دبلۆماسیه‌تا سه‌رۆكێ وێ حكومه‌تێ ل هه‌مبه‌ر به‌غدا و ده‌رڤه و پرسێن ناڤخوه‌یا هه‌رێمێ سه‌ركه‌فتى بوویه، مه‌ره‌م ژ سه‌ركه‌فتنا وان بزاڤان ژى ئه‌وه ده‌ما ئه‌م ب كردار به‌رهه‌مێ وان بزاڤان د ناڤا جڤاكى دا دبینین.
د داوى راگه‌هانا په‌یڤدارێ حكومه‌تا هه‌رێمێ ئه‌و یه‌ك هاتیه گۆتن كو ل ده‌مه‌كێ نزیك دێ سه‌د ملیۆن دۆلاران ده‌نه به‌لێنده‌رێن هه‌رێما كوردستانێ، هێشتا ئه‌و سه‌د ملیۆن نه‌هاتینه مه‌زاختن ژى ئه‌م یێ گهۆرینێ د كه‌رتێ وه‌به‌رهێنانێ دا دبینین كو ب ده‌هان پرۆژه‌یێن وه‌به‌رهێنانێ و یه‌كه‌یێن ئاكنجیبوونێ كو د قه‌یرانێ دا راوه‌ستیاین.
دووباره كاركرن دناڤ دا ده‌ست پێكرینه‌ڤه و ڤێ یه‌كێ ژی لڤین و بزاڤه‌كا زێده‌تر دناڤا بازارێن هه‌رێما كوردستانێ دروست كریه و بوویه ئه‌گه‌رێ هندێ به‌شه‌كێ زۆر ژ وان كرێكارێن كو ل وى ده‌مى كارێن خوه ژ ده‌ست داین؛ جاردن ببنه‌ڤه خوه‌دان كار و ژیانا خوه یا رۆژانه پێ دابین بكه‌ن، كه‌واته ئه‌و سه‌رده‌مێ زێرینێ هه‌رێما كوردستانێ و خه‌لكێ وێ ل سالێن به‌رى هاتنا داعشێ و ئه‌رزانبوونا بهایێ په‌ترۆلێ و برینا بۆدجه‌ى دیتبوو.
جاردن حكومه‌تا هه‌رێمێ به‌ره‌ڤ ڤه‌گه‌راندنا وى سه‌رده‌مێ زیرێن ڤه‌دگه‌ریته‌ڤه، ئێك ژ كه‌رتێن گرنگین وى ده‌مى كه‌رتێ وه‌به‌رهێنانێ بوو، كو بێگومان ئه‌و قه‌یرانا چێبووى زیانه‌كا مه‌زن ب خه‌لكى گه‌هاند و گه‌له‌ك خه‌لكى ناڤێ خوه ژ بۆ یه‌كه‌یێن ئاكنجیبوونێ تۆماركربوو، لێ به‌رى شقه و خانیێن خوه ببینن، بێ هیڤیبوون ل ده‌ڤ وان درست بوو، لێ ئه‌و پێنگاڤێن نها حكومه‌تا هه‌رێما كوردستانێ دكه‌ت.
ڤه‌گه‌راندنا هیڤیێ یه بۆ وى خه‌لكى و جاردن دروستكرنا باوه‌ریێ دناڤبه‌را خه‌لك و حكومه‌تێ دا، چونكى ب دابه‌شكرنا سه‌د ملیۆن دۆلاران به‌لێنده‌رێن هه‌رێما كوردستانێ، ئیدى ئه‌و به‌لێنده‌ر ب ڤێ كوژمه پاره‌یا حكومه‌تا هه‌رێمێ دكارن گه‌له‌ك ژ وان پرۆژه‌یێن وه‌به‌رهێنانێ بده‌نه‌ڤه كارى.
بێ گومان ئه‌ڤه نه داوى به‌رهه‌مێ ڤێ كابینا حكومه‌تێ یه و نه‌ژ ى یا ده‌ست پێكێ یه، چونكى پێشتر مه ئه‌و گهۆرین دیتن كو حكومه‌تا هه‌رێما كوردستانێ ب سه‌ر پاشكه‌فتا موچه‌ى دا ئیناى هه‌تا گه‌هشتیه قوناغا داویێ و راكرنا پاشكه‌فتا مووچه‌ى، هه‌روه‌سا جاره‌كادى حكومه‌تا هه‌رێما كوردستانێ ب قوناغ پشكه‌ك ژ پاره‌یێ به‌لێنده‌ران مه‌زاخت بوو ئه‌و ژى بوویه ئه‌گه‌ر كو گهۆرین د وان پرۆژه‌یێن بهێنه كرن كو راوه‌ستیا بوون.
