ئه‌مریكا چ جارا ده‌ستێ كه‌سێ ناگریت ئه‌گه‌ر نه‌زانیت سوباهى دێ مفایه‌ك تێدا هه‌بیت ئانكو ئه‌مریكا ل سه‌ر بنه‌مایێ به‌رژه‌وه‌ندییان كار دكه‌ن، نه‌ك عاتیفێ هه‌ر ئه‌ڤ چه‌نده‌ژى گه‌له‌ك جاران دبیته ئه‌گه‌ر كو ره‌خنه ل ئه‌مریكا بهێته‌گرتن كو هه‌رده‌م پشته‌خوه دده‌ته هه‌ڤالێن خوه و ب خیانه‌تكار دهێته ناڤكرن، به‌لێ ئه‌گه‌ر ئه‌م ب هویرتر بچینه ناڤ بابه‌تى دێ هنده‌ك تشتێن دیتر بینین ئه‌وژى ئه‌مریكا ئه‌ڤرۆكه سه‌ركێشیا جیهانێ دكه‌ت و چ جارا نه‌ڤێت ڤێ سه‌ركێشیێ ژ ده‌ست بده‌ت و نوكه چه‌ندین وه‌لات شه‌رى دكه‌ن كو ڤێ سه‌ركێشیێ ژ ئه‌مریكا وه‌ربگرن وه‌كو چینێ و رۆسیا هه‌ر ژ به‌رهندێ ئه‌مریكا چ جارا یا به‌رهه‌ڤ نینه به‌رژه‌وه‌ندیێن خوه بێخیته د مه‌ترسیێ دا بۆ چ وه‌لاتان دێ وێ كه‌ت یا پتر د به‌رژه‌وه‌ندییا وێ دا و كێمتر زیان بگه‌هیتێ.
سیاسه‌ت بخوه زانسته‌كێ به‌رفره‌هه و نوكه د كورده‌واریا مه دا یا كولانكى ده‌مێ دبێژن سیاسه‌ت هه‌موو دره‌وه، ئه‌ڤه بخوه ره‌ڤینه ژ فێربوونا زانسته‌كێ گرنگ ئه‌وژى سیاسه‌ته كو گه‌له‌ك جارا بۆ پاراستنا به‌رژه‌وه‌ندیێن وه‌لاتێ خوه یان كێمكرنا زیانان یان پاراستنا وه‌لاتیان ب كێمتر زیان سه‌ركرده یان بریار ب ده‌ستێن وه‌لاته‌كى نه‌چار بن گه‌له‌ك بریاران بده‌ن و ئه‌گه‌ر ئه‌م به‌رێ خوه بده‌ینه پشتى 16ى ئۆكتۆبه‌رێ و زێده‌بوونا مه‌ترسیان ل سه‌ر هه‌رێما كوردستانێ سه‌رۆكێ حكومه‌تا هه‌رێما كوردستانێ نێچیرڤان بارزانى بریارا سركرنا ریفراندومێ دا بۆ ده‌مێ دوسالان ل وى ده‌مى گه‌له‌ك كه‌سان ئه‌ڤ بریاره ب بریاره‌كا نه‌درست ل قه‌له‌م دا، به‌لێ ئه‌گه‌ر كه‌سه‌ك باش د زانستێ سیاسه‌تێ بگه‌هیت دێ زانیت كو خواندنا درست بۆ واقعى و ده‌ڤه‌رێ ل وى ده‌مى ئه‌و باشترین بریار بوو، ژبه‌ركو هه‌موو چ چه‌كه‌ك نه‌هێلا هه‌م بۆ حكومه‌تا عیراقێ كو به‌رده‌وامیێ بده‌ته هێرشێن خوه بۆ سه‌ر هه‌رێمێ و دیسان چ بهانه‌یه‌ك بۆ وه‌لاتێن جیرانژى نه‌هێلا و هه‌رێم ژ مه‌ترسیه‌كا جدى پاراست و ل وى ده‌مى پترییا وه‌لاتێن جیهانى پێشوازییه‌كا مه‌زن ل وێ بریارێ كر و داخواز ژ به‌غدا كر هێرشێن خوه بۆ سه‌ر كوردان راگریت.
لڤێره خالا گرنگ و سه‌ره‌كى ئه‌وه كو حكومه‌تا هه‌رێما كوردستانێ و وه‌لاتیێن هه‌رێمێ شیاینه باوه‌ریێ بۆ ئه‌مریكا درست بكه‌ن و دوستێن باوه‌رپێكریێن ئه‌مریكا كوردن و ئه‌مریكاژى ب پاراستنا كوردان چه‌ندین به‌رژه‌وه‌ندی هه‌نه وه‌كو ستراتیژیه‌تا ئاخا هه‌رێما كوردستانێ كو دناڤبه‌را چوار وه‌لاتان دایه وه‌كو ئیران و عیراق و سۆریا و تۆركیا ئه‌ڤ چه‌نده‌ژى دێ ب ساناهى ئه‌مریكا گه‌هینته ڤان وه‌لاتان ب تایبه‌تى ئیران كو ئه‌مریكا ب مه‌ترسیه‌كا جدى ل سه‌ر خوه و هه‌ڤپه‌یمانێن خوه دزانیت.
ل دوماهیكێ یا گرنگه ئه‌م بزانین كو ئه‌مریكا ب چ ره‌نگان ده‌ستان ژ كوردان به‌رناده‌ت و كورد ئه‌ڤرۆكه ژماره‌نه ل سه‌ر ئاستێ جیهانى و نڤیده‌وله‌تى و یا باش ئه‌و كو بزانین سیاسه‌ت دره‌و نینه به‌لكو زانسته بۆ تێگه‌هشتنێ د سیاسه‌تێ دا پێدڤیه بخوینین وه‌كو هه‌موو زانستێن دیتر.
