نووسینگه‌ی جێگری سه‌رۆكی پارتی دوو وه‌رزشوانی لاوی كورد خه‌ڵات ده‌كات

وه‌رزشوانی لاو مسته‌فا ڕه‌شید‌ و خاتوو خه‌یاڵ حه‌مه‌


ئێواره‌ی ئه‌مڕۆ پێنجشه‌ممه‌ 10/10/2019 له‌ ڕێوڕه‌سمێكدا له‌ هه‌ولێر هه‌ردوو وه‌رزشوانی لاوی كورد به‌ڕێز مسته‌فا ڕه‌شید‌ و خاتوو خه‌یاڵ حه‌مه‌ له‌لایه‌ن نووسینگه‌ی جێگری سه‌رۆكه‌وه‌ خه‌ڵاتكران.

له‌ ڕێوڕه‌سمه‌كه‌دا به‌ڕێز ته‌ها به‌رواری به‌رپرسی نووسینگه‌ی جێگری سه‌رۆكی پارتی دیموكراتی كوردستان به‌ ناوی به‌ڕێز نێچیرڤان بارزانییه‌وه‌ پیرۆزبایی له‌ هه‌ردوو وه‌رزشوانه‌ كورده‌كه‌ كرد و هیوای سه‌ركه‌وتنی بۆ خواستن له‌ ڕێڕه‌وی وه‌رزشییاندا و دواتر دیاری نووسینگه‌ی جیگری سه‌رۆكی پێشكه‌ش كردن، لای خۆیانه‌وه‌ هه‌ردوو وه‌رزشوانه‌كه‌ سوپاسی به‌ڕێز جێگری سه‌رۆكی پارتی و نووسینگه‌كه‌یان كرد بۆ ئه‌و به‌سه‌ركردنه‌وه‌یه‌.

وه‌رزشوان مسته‌فا ڕه‌شید خه‌ڵكی شاری دهۆكه‌ و توانی بۆ ماوه‌ی زیاتر له‌ په‌نجا و پێنج كاتژمێر و چوارده‌ خوله‌ك یاری كیك بۆكسینگ بێ وه‌ستان ئه‌نجام بدات و ڕیكۆردی جیهانی بشكێنێت و ناوی خۆی له‌ په‌رتووكی گێنس تۆمار بكات، هه‌روه‌ها خاتوو خه‌یاڵ حه‌مه‌ یاریزانی یانه‌ی باله‌ی ده‌ربه‌ندیخانه‌ كه‌ له‌به‌ر لێهاتووییه‌كه‌ی له‌لایه‌ن هه‌ڵبژارده‌ی باله‌ی عێراقه‌وه‌ گرێبه‌ستی بۆ ڕێكخراوه‌ تا له‌ هه‌ڵبژارده‌كه‌یاندا یاری بكات.

هه‌ریه‌ك له‌ خاتوو ئه‌ڤین هروری به‌رپرسی ده‌سته‌ی ڕێكخراوه‌ جه‌ماوه‌رییه‌كانی پارتی دیموكراتی كوردستان و به‌ڕێز مه‌یسه‌ر عوبێد سكرتێری یه‌كێتیی لاوانی دیموكراتی كوردستان ئاماده‌ی ڕێوڕه‌سمه‌كه‌ بوون.