نه‌ته‌وه‌ یه‌كگرتووه‌كان: 821 ملیۆن كه‌س له‌ جیهاندا دووچاری برسیبوون هاتوون

به‌هۆی ڕووداوه‌كانی كه‌شوهه‌وا و پیسبوونی ژینگه‌وه‌یه‌

له‌ ڕاپۆرتێكیدا نه‌ته‌وه ‌یه‌كگرتووه‌كان ئاشكرایكردووه‌، ئه‌مساڵ له‌گه‌ڵ كاره‌ساته‌كانی كه‌ش وهه‌وا ژماره‌ی مرۆڤه‌ برسییه‌كان زیادیكردووه‌. له‌ ماوه‌ی سێ ساڵی ڕابردوودا ژماره‌ی ئه‌و كه‌سانه‌ی كێشه‌ی برسیبوون (خواردن و خواردنه‌وه‌) یان هه‌یه‌، به‌شێوه‌یه‌كی به‌رچاو له‌ جیهاندا زیادیكردووه‌. پێنج ڕێكخراوی سه‌ر به‌ نه‌ته‌وه‌یه‌كگرتووه‌كان ڕاپۆرتێكی هاوبه‌شیان بڵاوكرده‌وه‌. به‌ گوێره‌ی ڕاپۆرته‌كه‌ گه‌رما و لافاوه‌كانی په‌یوه‌ندیدار به‌ گۆڕانی كه‌ش وهه‌وا و وشكه‌ساڵی بوونه‌ته‌ سه‌ره‌كیترین هۆی قه‌یرانی برسیبوون. ساڵی دووهه‌زار و نوزده‌ ژماره‌ی ئه‌و كه‌سانه‌ی كێشه‌ی برسیبوونیان هه‌یه‌، بۆ هه‌شتسه‌د و بیست و یه‌ك ملیۆن كه‌س به‌رز بووه‌ته‌وه‌. ئه‌مه‌ له‌ كاتێكدا یه‌ كه‌ ساڵی دووهه‌زار و شازده‌ ژماره‌ی مرۆڤه‌ برسییه‌كان هه‌شتسه‌د و چوار ملیۆن كه‌س بوو. كیشوه‌ری ئه‌فریقیا له‌و ڕێژه‌یه‌ زۆرترین به‌شی هه‌یه‌ كه‌ سه‌دا بیست و یه‌كی دانیشتوانه‌كه‌ی كێشه‌ی برسیبوونیان هه‌یه‌. هه‌روه‌ها سه‌دا یازده‌ پۆینت چواری دانیشتوانی ئاسیا، سه‌دا شه‌ش پۆینت یه‌كی دانیشتوانی ئه‌مه‌ریكای لاتین، سه‌دا حه‌فتی دانیشتوانی ئۆقیانووس و سه‌دا دوو پۆینت پێنجی دانیشتوانی ئه‌مه‌ریكای باكوور و ئه‌ورووپا برسین. ڕاپۆرته‌كه‌ له‌ لایه‌ن ڕێكخراوی كشتوكاڵ و خۆراك فاو، ڕێكخراوی په‌روه‌رده‌ و منداڵان یونیسێف، به‌رنامه‌ی خۆراكی جیهانی پی ئه‌ی ئێم و ڕێكخراوی ته‌ندرووستیی ده‌بلیۆ ئێچ ئۆ كه‌ سه‌ر به‌ نه‌ته‌وه ‌یه‌كگرتووه‌كانن، ئاماده‌یان كردووه‌.