نەتەوە یەکگرتووەکان: بەڵگەی روون و باوەڕپێکراو هەیە کە ئێزدییەکان کۆمەڵکوژ کراون لەلایەن داعشەوە

سەرۆکی دەستەی نەتەوە یەکگرتووەکان تایبەت بە لێکۆڵینەوە لە تاوانەکانی داعش لە عێراق و سوریا رایگەیاند، ئەوە پشتڕاستكراوه‌ته‌وه‌، کە بەپێی بەدواداچوونە سەربەخۆکانیان بەڵگەی روون و باوەڕپێکراویان هەیە کە ئێزدییەکان کۆمەڵکوژ کراون لەلایەن داعشەوە.

تیمی لێکۆڵینەوەی نەتەوە یەکگرتووەکان یونیتاد لە تویتەر راگه‌یه‌نراوێكی بڵاوکرۆته‌وە، کەریم خان راوێژکاری تایبەت و سەرۆکی دەستەی نەتەوە یەکگرتووەکان تایبەت بە لێکۆڵینەوە لە تاوانەکانی داعش لە عێراق و سوریا رایگەیاندوە، داعش لە عێراق بەرنامەیەکی چەکی کیمیایی فراوانی هەبووە و لەسەر بەندکراوەکان تاقیکردووەتەوە بۆ زانینی کاریگەرییە بایۆلۆجی و کیمیاییەکان.

لەبارەی کارەکانیانەوە لە عێراق راشیگەیاند، لەماوەکانی رابردوودا بەرەوپێشچوونی زۆر باش لە کارەکانی یونیتاد هەبووە ئەوەش بەهۆی نوێگەری و هاوکارییه‌كانی حكومه‌تی هه‌رێمی كوردستانه‌وه‌ بووه‌. ئاماژه‌ی به‌وه‌شكرد، قوربانیانی دەستی داعش مافی خۆیانە دادپەروەرانە مامەڵەیان لەگەڵ بکرێت و نەوەی داهاتوش لە شوێنێکدا بژین کە ئەمنییەتی پارێزراو و ئاسایشی بەرقەراربێت.

تیمی لێکۆڵینەوەی نەتەوە یەکگرتووەکان تاوەکو ئێستا شەش راپۆرتی پێشکەشی ئەنجوومەنی ئاسایش کردووە، کە تیایاندا سەدان بەڵگەی ڤیدیۆیی، بەڵگەنامەی نووسراو، لێدوانی قوربانیان و شایەتحاڵانی تێدایە.