مه‌حما خه‌لیل: هۆكاری نه‌گه‌ڕانه‌وه‌ی ئێزدییه‌كان بریتیه‌ له‌ بوونی په‌كه‌كه‌ له‌ سه‌ر چیای شنگال

پێشنیاز ده‌كات ناوچه‌یه‌كی ئارام دروست بكرێت


قائیمقامی شنگال له‌ پێناو گەڕانەوەی ئێزدییەکان بۆ ناوچەکانیان پێشنیاز ده‌كات، ناوچه‌یه‌كی ئارام بۆ گه‌ڕانه‌وه‌ی ئێزدییه‌كان دروست بكرێت.

مه‌حما خه‌لیل، قائیمقامی شنگال، لەبارەی دروستکردنی ناوچەی ئارام لە باکووری سووریا و هەڕەشەکانی بەردەم گەڕانەوەی ئێزدییەکان بۆ ناوچەکانیان راگەیەندراوێکی بڵاوکردەوەو و تیایدا کێشە ئەمنییەکان دەخاتەڕوو.

لە راگەیەندراوەکەی قائیمقامی شنگال هاتووە: دروستكردنی ناوچه‌ی ئارام له‌ باكووری سووریا كاریگه‌ری نه‌رێنی له‌سه‌ر شنگال و ده‌شتی نه‌ینه‌وا و ناوچه‌ سنوورییه‌كان له‌گه‌ڵ سووریا ده‌بێت و هه‌روه‌ها ده‌بێته‌ هۆی گه‌ڕانه‌وه‌ی داعش بۆ ناوچه‌ سنوورییه‌كان به‌ تایبه‌ت بۆ شنگال.

له‌ راگه‌یه‌ندراوه‌كه‌دا هاتووه‌، دروستكردنی ناوچه‌ی ئارام له‌ سووریا كه‌ توركیا و ئه‌مەریكا سه‌رپه‌رشتی ده‌كه‌ن، كاریگه‌ری نه‌رێنی له‌ سه‌ر دۆخی شنگال و ده‌شتی نه‌ینه‌وا و ناوچه‌ سنوورییه‌كان له‌گه‌ڵ سووریا ده‌بێت.

مه‌حما خه‌لیل له‌ پێناو گەڕانەوەی ئێزدییەکان بۆ ناوچەکانیان پێشنیاز ده‌كات، ناوچه‌یه‌كی ئارام بۆ گه‌ڕانه‌وه‌ی ئێزدییه‌كان دروست بكرێت كه‌ ئه‌مەریكا و حكوومه‌تی عێراق و حكوومه‌تی هه‌رێمی كوردستان سه‌رپه‌رشتی بكه‌ن.

قائیمقامی شنگال جه‌ختیی كردووه‌ته‌وه‌ كه‌ هۆكاری نه‌گه‌ڕانه‌وه‌ی ئێزدییه‌كان بۆ ناوچه‌كانیان، بریتیه‌ له‌ بوونی په‌كه‌كه‌ له‌ سه‌ر چیای شنگال، كه‌ رێز له‌ یاساكانی عێراق ناگرێت و پێشێلكاری ئه‌نجام ده‌دات.

قائیمقامی شنگال ده‌ڵێت: ناوچه‌كانیان بۆ په‌كه‌كه‌ بووه‌ته‌‌ پێگه‌یه‌كی ئارام و سه‌رچاوه‌ی چه‌كداركردن و پاره‌داركردن.

هه‌روه‌ها، په‌كه‌كه‌ی‌ به‌ هاوكاریكردنی به‌شێك له‌ هۆزه‌ عه‌ره‌بییه‌كان تۆمه‌تبار کرد كه‌ پێشتر ده‌ستیان له‌گه‌ڵ داعشدا هه‌بووه‌.