عێراق ره‌تیكرده‌وه‌ خاكه‌كه‌ی بۆ هێرشكردنه‌ سه‌ر سعودیه‌ به‌كارهێنرابێت

هاوكات تارانیش تۆمه‌ته‌كانی ئه‌مه‌ریكا له‌مباره‌یه‌وه‌ ره‌تده‌كاته‌وه‌


حكوومه‌تی عێراق ره‌تیكرده‌وه‌ كه‌ خاكی وڵاته‌كه‌ی بۆ هێرشكردنه‌ سه‌ر سعودیه‌ به‌كارهێنرابێت .

ئه‌مه‌ش دوای ئه‌وه‌ هات كه‌ به‌ پێی چه‌ند راپۆرتێك هێرشه‌كانی سه‌ر كۆمپانیای ئارامكۆی سعودیه‌ له‌ خاكی عێراقه‌وه‌ ئه‌نجام دراوه‌ .

له‌وباره‌یه‌وه‌ نووسینگه‌ی سه‌رۆك وه‌زیرانی عێراق له‌ به‌یاننامه‌یه‌كدا رایگه‌یاند عێراق ئه‌و هه‌واڵانه‌ ره‌تده‌كاته‌وه‌ كه‌ له‌ ژماره‌یه‌ك میدیای ناوخۆیی و ناوچه‌یی و جیهانیدا بڵاوكراونه‌ته‌وه‌ و باس له‌وه‌ ده‌كه‌ن گوایه‌ خاكی عێراق بۆ هێرشكردنه‌ سه‌ر دامه‌زراوه‌ نه‌وتییه‌كانی سعوودییه‌ به‌كارهێنراوه‌ .

له‌ به‌یاننامه‌كه‌دا ئاماژه‌ به‌وه‌ش كراوه‌ كه‌ عێراق دووپاتی ده‌كاته‌وه‌ پابه‌نده‌ به‌ ده‌ستوور و رێگه‌گرتن له‌ به‌كارهێنانی خاكی وڵاته‌كه‌ی دژی وڵاتانی دراوسێ و براو و هاوڕێكانی ، حكوومه‌تی عێراق به‌ توندی رووبه‌ڕووی ئه‌وانه‌ ده‌بێته‌وه‌ كه‌ ده‌یانه‌وێت ده‌ستوور پێشێل بكه‌ن .

به‌یاننامه‌كه‌ی نووسینگه‌ی سه‌رۆك وه‌زیرانی عێراق ئاماژه‌ی به‌ش داوه‌ كه‌ لیژنه‌یه‌كی عێراقیی په‌یوه‌ندار بۆ چاودێریی زانیاریی و پێشهاته‌ نوێیه‌كان پێكهێنراوه و داوا له‌ هه‌موو لایه‌نه‌كانیش ده‌كه‌ن ده‌ست له‌ هێرشكردنه‌ سه‌ر یه‌كتری هه‌ڵگرن تا نه‌بێته‌ هۆی زیانی گه‌وره‌ی گیانی و ماددی بۆ سه‌ر دامه‌زراوه‌كان.

به‌ پێی راپۆراتێكی رۆژنامه‌ی وۆل ستریت جۆرناڵی ئه‌مه‌ریكی شاره‌زایانی ئه‌مه‌ریكی و سعوودی لێكۆڵینه‌وه‌ له‌ هێرشی سه‌ر دامه‌زراوه‌ نه‌وتییه‌كانی كۆمپانیای ئارامكۆ ده‌كه‌ن و پێیانوایه‌ كه‌ له‌وانه‌یه‌ هێرشه‌ موشه‌كییه‌كه‌ له‌ ناو خاكی عێراقه‌وه‌ یان خاكی ئێرانه‌وه‌ ئیه‌نجام درابێت ، هاوكات تارانیش تۆمه‌ته‌كانی ئه‌مه‌ریكا له‌مباره‌یه‌وه‌ ره‌تده‌كاته‌وه‌.

مایك پۆمپیۆ، وه‌زیری ده‌ره‌وه‌ی ئه‌مه‌ریكاش له‌ تویتێكدا نووسیویه‌تی هیچ به‌ڵگه‌یه‌ك به‌رده‌ست نییه‌ كه‌ مووشه‌كه‌كان له‌ یه‌مه‌نه‌وه‌ ئاراسته‌ كرابن.