كامه‌ران غه‌ریب: باره‌گای لقی چوار له‌ سلێمانی سیمبول و هێمای پارتی دیموكراتی كوردستانه‌ له‌و شاره‌

كارگێری لقی چواری پارتی له‌ لێدوانێكی تایبه‌ت بۆ كوردستان تیڤی

بەرەبەیانی ئەمڕۆ تەقە لە لقی چواری پارتی دیموكراتی كوردستان لە سلێمانی کرا، به‌ڵام هیچ زیانێکی گیانی نەبووە. 

کاتژمێر 1:30ی بەرەبەیانی ئەمڕۆ هەینی 20ی 9ی 2019، چه‌ند چه‌كدارێكی نه‌ناسراو له‌ ناو ئۆتۆمبیلێكه‌وه‌ ته‌قه‌یان لە بارەگای لقی چواری پارتی دیموكراتی كوردستان له‌ سلێمانی كرد و تەقەکردنەکە هیچ زیانێکی گیانی نەبوو . 

له‌ وه‌ڵامی ئه‌و ته‌قه‌یه‌ش كه‌ چه‌كداره‌كان له‌ لقی چواریان كرد، پاسه‌وانه‌كانی لقیش ته‌قه‌یان كرد، تا ئێستاش هیچ لایه‌نێك به‌رپرسیاریه‌تیی خۆی له‌و ته‌قه‌كردنه‌ی سه‌ر لقی چوار له‌ سلێمانی رانه‌گه‌یاندووه‌ و لایه‌نه‌ ئه‌منییه‌كانیش هیچ روونكردنه‌وه‌ یان لێدوانیان نه‌داوه‌. 

له‌ باره‌ی ئه‌م ته‌قه‌كردنه‌وه‌ له‌ لێدوانێكی تایبه‌ت بۆ كوردستان تیڤی كامه‌ران غه‌ریب كارگێری لقی چواری پارتی دیموكراتی كوردستان رایگه‌یاند: كاتژمێر 12:27 خوله‌كی شه‌و ئۆتۆمبێلێكی جۆری فورد قه‌مه‌ره‌ ره‌نگی ره‌ش گه‌یشته‌ به‌رده‌م باره‌گای لقی چواری پارتی و ده‌سترێژی له‌ باره‌گاكه‌مان كردووه‌ و به‌ خۆشحاڵیه‌وه‌ زیانی گیانی نه‌بووه‌ و پاسه‌وانه‌كانی لقیش وه‌ڵامی ته‌قه‌كه‌ره‌كانیان داوه‌ته‌وه‌. 

هاوكات رایگه‌یاند: ئه‌و شوێنه‌ كامێرای لێیه‌ و ژماره‌ی ئۆتۆمبێله‌كه‌ش ده‌ركه‌وتووه‌ و ئێمه‌ش لایه‌نه‌ ئه‌منییه‌كان و پۆلیسی سلێمانیمان له‌و رووداوه‌ ئاگادار كردۆته‌وه‌. 

راشیگه‌یاند: تا ئێستا پۆلیس و ئاسایش هه‌ڵوێستی فه‌رمیان نییه‌ و لێكۆڵینه‌وه‌كان له‌ قۆناغی سه‌ره‌تاییدان و به‌ر‌ده‌وامن. 

جه‌ختیشی كرده‌وه‌ به‌داخه‌وه‌ باره‌گای لقی چوار له‌ سلێمانی كه‌ سیمبول و هێمای پارتی دیموكراتی كوردستانه‌ ، چه‌ندین جاری دیكه‌ش‌ هێرشی كراوه‌ته‌سه‌ر.