وه‌زاره‌تى پێشمەرگە هێزی زیاتر رەوانەی گەرمەسێر دەکات

جه‌عفه‌ر شێخ مسته‌فا: داعش شەڕی پارتیزانی دەکات و خۆی رێکخستووەتەوە

دوای په‌لاماری چه‌كدارانی داعش و شه‌هیدبوونی ژماره‌یه‌ك پێشمه‌رگه‌، وه‌زاره‌تى پێشمه‌رگه‌ بڕیاری داوه‌ هێزی زیاتر ره‌وانه‌ی ناوچه‌كه‌ بكات بۆ پته‌وتركردنی سه‌نگه‌ره‌كانی به‌رگری و بۆ ئه‌م مه‌به‌سته‌ش وه‌زاره‌تی پێشمه‌رگه‌ی هه‌رێمی كوردستان، فه‌وجه‌كانی لیوای (16)ـی پێشمه‌رگه‌ی به‌ره‌و سه‌نگه‌ره‌كانی پێشه‌وه‌ی به‌رگری له‌ سنووری گه‌رمیان جوڵاند.

هه‌روه‌ها جه‌عفه‌ر شێخ مسته‌فا جێگری سه‌رۆكی هه‌رێمی كوردستان،  سه‌رپه‌رشتی جوڵه‌پێكردنی هێزه‌كه‌ ده‌كات و له‌م باره‌وه‌ ناوبراو بۆ بەسەرکردنەوەی هێزەکانی پێشمەرگە گەیشتە گەرمیان و لە لێدوانێکدا رایگەیاند، جموجۆڵی داعش زیادی کردووە .

وتیشى" داعش ئێستا شەڕی پارتیزانی دەکات و خۆی رێکخستووەتەوە، سوودیشیان لەو بۆشایە وەگرتووە کە لەنێوان هێزەکانی پێشمەرگە و سوپای عێراق لە ناوچەکەدا هەیە.

راشیگه‌یاند" ئه‌و هێزه‌ی پێشمه‌رگه‌، كه‌ ره‌وانه‌ی ناوچه‌كه‌ كراوه‌ له‌مه‌ودوا له‌ ئه‌ركدا ده‌بن بۆ به‌ره‌نگاربوونه‌وه‌ی مه‌ترسییه‌كانی تیرۆر له‌ سنووری گه‌رمیان.