هه‌وڵه‌كان به‌رده‌وامن بۆ کوژاندنەوەی ئاگری دارستانەکانی مارماریسی توركیا و دوورگه‌ی رۆدۆسی یۆنان

هه‌وڵه‌كان به‌رده‌وامن بۆ كۆنترۆڵكردنی ئه‌و ئاگره‌ی کە دوێنێ له‌ دارستانه‌كانی ناوچه‌ی سۆفوڵو له‌ نزیك سنووری توركیا لەگەڵ یۆنان و دوورگه‌ی رۆدۆس سەربە یۆنان كه‌وتنه‌وه‌.

به‌رپرسانی ئاگركوژێنه‌وه‌ له‌ یۆنان ئاماژه‌یان به‌وه‌ داوه‌ كه‌ ئه‌و ئاگره‌ی له‌ ناوچه‌ی پسینتو باكووری دوورگەی رۆدۆس كه‌وتووه‌ته‌وه‌، زیانێكی زۆری به‌ سروشت گه‌یاندووه‌، به‌هۆی ئه‌و بایه‌ی کە هه‌ڵی كردووه‌، ئاگره‌كه‌ ته‌شه‌نه‌ی سه‌ندووه‌ بۆ ناوچه‌كانی تۆلۆس و ماریچا.

ژماره‌یه‌كی زۆر كارمه‌ندی ئاگركوژێنه‌وه‌ به‌ به‌كارهێنانی ئامێر و ئامرازی زه‌مینیی و ئاسمانیی هه‌وڵی دامركاندنه‌وه‌ی ئاگره‌كه‌ ده‌ده‌ن.

به‌پێی ئه‌و هه‌واڵانه‌ی له‌ میدیاكانی یۆنان بڵاوكراونه‌ته‌وه‌، وه‌ك گرتنه‌به‌ری رێوشوێنی پێویست، گوندی پسینتو و دۆڵی په‌پووله‌كان چۆڵ كراون و بنكه‌ی فریاكه‌وتنی خێرایش له‌ رێگای كورته‌نامه‌وه‌، خه‌ڵكی گونده‌كانی ماریچا و كالیته‌یس-ی ئاگادار كردووه‌ته‌وه‌ كه‌ له‌ ئاماده‌باشیدان بۆ چۆڵكردنی ناوچه‌كانیان.


 له‌ لایه‌كی دیكه‌وه‌ ، کارەکان بۆ کوژاندنەوەی ئەو ئاگرە درێژەی هەیە کە دارستانەکانی قەزای مارماریس سەربە پارێزگا موغڵای توركیای گرتووەتەوە.

بلێسەی ئەو ئاگرەی کە لە دارستانەکانی ناوچەی هیسارۆنو بەرزدەبێتەوە بە کاریگەری باوە تەشەنەی کردە دەورووبەری ناوچەکانی نیشتەجێبوونی سەنتەری شاری مارماریس.

بەهۆی ئەوەی ئاگرەکە ناو بە ناو ئاراستەی دەگۆڕێت، تیمەکان دووچاری سەختی دەبنەوە لە کۆنترۆڵکردنیدا، هاوکات بوونی دووکەڵی زۆر کاری تیمەکانی سەخت کردووە.

ژمارەیەکی زۆر لە ئۆتۆمبێلی ئاگرکوژێنەوە کە رەوانەی ناوچەکە کراون، بەردەوامن لەسەر هەوڵەکانیان بۆ کۆنترۆڵکردنی ئاگرەکە.

هاوکات هاووڵاتییانیش پشتیوانی لە هەڵمەتی کوژاندنەوەی ئاگرەکە دەکەن.