بە بەهای زیاتر لە نیو ملیار دینار 22 پرۆژە لە شارۆچكەكانی دەوروبەری هەولێر جێبەجێ دەكرێن


لەسەر ڕێژەی 15%ی داهاتی شارەوانییەكان 22 پرۆژەی هەمەجۆری خزمەتگوزاری لە شارۆچكەكانی دەوروبەری هەولێر جێبەجێ دەكرێن.
 له‌ راگه‌یاندراوێكدا، وه‌زاره‌تی شاره‌وانی و گه‌شت و گوزاری حكوومه‌تی هه‌رێمی كوردستان بڵاویكرده‌وه‌: لەسەر ڕێژەی 15%ی داهاتی شارەوانییەكان 22 پرۆژەی هەمەجۆری خزمەتگوزاری لە شارۆچكەكانی دەوروبەری هەولێر جێبەجێ دەكرێن و وەزارەتیش بڕیاری خەرجكردنی زیاتر لە 537 ملیۆن دیناری داوە بۆ تەواوكردنی پرۆژەكان.
 وه‌زاره‌تی شاره‌وانی رایده‌گه‌ێنێت: ئەو شارۆچكانەی لەو گوژمەیە سوودمەند دەبن، سەرجەمیان كەوتوونەتە سنووری بەڕێوەبەرایەتیی گشتیی شارەوانییەكانی هەولێر، ئەوانیش: قوشتەپەی نوێ، كانی قڕژاڵە، بنەسڵاوە، شەمامك، خەلیفان، سفەیە، ئاشتی، تەقتەق، بەحركە، بالیسان، نۆژەنكردنەوەی بینای شارەوانیی ڕزگاری، دارەتوو، خەبات، كەسنەزان، ناحیەی هیران، مەلائۆمەر، شەقڵاوە، باسرمە، سكتان.
وەك لە فەرمانێكی وەزاری، وەزارەتی شارەوانی و گەشتوگوزاردا هاتووە: خەرجكردنی گوژمەی (537,664,250) پێنجسەد و سی و حەفت ملیۆن و شەشسەد و شەست و چوار هەزار و دووسەد و پەنجا دینار لەسەر ڕێژەى %15ى داهاتى شارەوانییەكان بە مەبەستی جێبەجێكردنی 22 پرۆژەی خزمەتگوزاری لە سنووری بەڕێوەبەرایەتیی شارەوانییەكانی هەولێر خەرج كرا.
پرۆژەكان لە سێكتەرەكانی: دروستكردنی شەقام، كۆنكرێتكردن، شۆستە و كربستۆن، گەیاندنی خزمەتگوزاری، تێكەڵەڕێژكردن، چاككردنی شەقام، دروستكردنی دیواری ڕاگر، دروستكردنی ئاوەڕۆی لوولەیی، نۆژەنكردنەوەی بینا و ڕێكخستنەوەی شەقام و چەندین سێكتەری دیكەی خزمەتگوزاری.


داڕشتنه‌وه‌ی هه‌واڵ - شوان عه‌زیز