Serê sibê îro, sêşemê, di encama kampanyayeke berfireh a polîsan de li çend bajarên Tirkiyeyê û Bakurê Kurdistanê, 7 endam û serokên Hevbeziya Niştimanî ya Kurdistanê hatin girtin. Li gorî agahiyên destpêkê, operasyon bi biryara dadgeha Komarê ya bajarê Amedê dest pê kiriye û biryara girtina 51 endamên vê hevbeziyê hatiye dayîn.
Di çarçoveya operasyonê de, li paytext Ankara, Bayram Bozyel, serokê Partiya Sosyalîst a Kurdistanê (PSK), û Hesen Dağtekin, cîgirê serokê heman partiyê, hatin girtin. Di heman demê de li Amedê, Elî Öncu, nûnerê kesayetiyên serbixwe, û li Mêrdînê Fuad Önên, endamê Pelkurdê, ligel 2 endamên Partiya Niştimanî ya Kurdistanê hatin girtin.
Ji aliyê din ve, Hevbeziya Niştimanî ya Kurdistanê di daxuyaniyeke fermî de operasyonê şermezar kir û ragihand ku heta niha 7 kes ji endamên wê hatine girtin, ku ev in: Bayram Bozyel, Fuad Önên, Mihemed Can Azbay, Rojbîn Bûkûn, Elî Öncu, Hesen Dağtekin û Elî Çewen.
Divê bê gotin ku Hevbezi platformeke siyasî ye ku di Konferansa 7an a Mijdara 2026an de li Amedê, bi beşdariya 170 siyasetmedar û kesayetiyên siyasî, hatiye damezrandin û di 9ê heman mehê de bi fermî hatiye ragihandin. Armanca sereke ya vê platformê ew e ku mafên neteweyî yên gelê Kurd, mafê çarenûsîya xwe û garantîkirina cihê siyasî û nasnameya neteweyî di destûrê de were nasîn, herwiha pişta hev ragirtina hêzên siyasî yên her 4 parçeyên Kurdistanê were xurtkirin.







