دکتۆرە داریا بۆگۆمۆلۆڤا، پزیشکی پسپۆڕی ڕووسی، کۆمەڵێک ڕێنمایی سادە و کاریگەر بۆ بەهێزکردنی سیستەمی بەرگریی لەش و پاراستنی چالاکیی جەستەیی لە وەرزی پاییزدا ئاشکرا دەکات.
بە گوتەی ئەو پزیشکە، پابەندبوون بە سیستەمێکی خۆراکی هاوسەنگ، ئەنجامدانی چالاکیی وەرزشی، و خەوتنی تەندروست، سێ کۆڵەکەی سەرەکین بۆ ڕووبەڕووبوونەوەی نەخۆشییەکان بەر لە هاتنی وەرزی زستان.
دکتۆرە داریا جەخت لەسەر گرنگیی جۆراوجۆریی خۆراک دەکاتەوە، چونکە سیستەمی بەرگری بەو ڕێگەیە دەتوانێت بە خێرایی مەیلی پاتۆجینەکان (میکرۆبەکان) بناسێتەوە و لەناویان ببات. بۆ ئەم مەبەستە، "شێوازی هارفارد" بۆ قاپێکی تەندروست پێشنیار دەکات کە تیرەکەی 22 بۆ 23 سانتیمەتر بێت و بەم شێوەیە دابەش بکرێت:
نیوەی قاپەکە: سەوزە و میوە.
چارەکێکی قاپەکە: پڕۆتینی ئاژەڵی یان ڕووەکی.
چارەکی کۆتایی: کاربۆهیدراتی ئاڵۆز.
ئەو پزیشکە ئاماژە بەوە دەکات کە وەرزشکردن، وەک مەلەکردن، ڕاکردن یان بەپێ ڕۆیشتن (بۆ ماوەی 1 کاتژمێر، 3 بۆ 4 جار لە هەفتەیەکدا)، یارمەتی باشترکردنی سووڕی خوێن دەدات. ئەمەش دەبێتە هۆی گەیاندنی خێرای ئۆکسجین و پێکهاتە خۆراکییەکان بە خانەکانی لەش و بەتایبەت خانەکانی سیستەمی بەرگری، کە ئەمەش کارایی بەرگری زیاد دەکات.
بەگوێرەی داریا بۆگۆمۆلۆڤا، کەمخەوی کاریگەریی ڕاستەوخۆی لەسەر کەمکردنەوەی چالاکیی "خانە کوژەرە سروشتییەکان" هەیە کە لەش لە ڤایرۆس و خانەی شێرپەنجەیی دەپارێزن.
هەروەها هۆشداری دەدات لە کاریگەریی سترێسی درێژخایەن کە بەرگریی لەش لاواز دەکات. بۆ چارەسەرکردنی ئەم کێشەیە، پێشنیار دەکات ڕۆژانە 10 بۆ 15 خولەک بۆ مەشقەکانی پشوودان وەک (مێدیتەیشن یان ڕاهێنانی هەناسەدان) تەرخان بکرێت.
لە کۆتاییدا، ئەو پزیشکە جەخت لەوە دەکاتەوە کە وەرگرتنی ڤاکسینە پێویستەکان ڕێکارێکی گرنگە بۆ کەمکردنەوەی ئەگەری تووشبوون بە نەخۆشییە مەترسیدارەکان و پاراستنی سەلامەتیی گشتی.
