ئەمشەو دووشەممە لە گەڕەكێكی شاری كەركووك، ئافرەتێك بەهۆی لێدانی دەرزییەوە گیانی لەدەستدا و هێزەكانی پۆلیس بۆ ئەم مەبەستەی لێكۆڵینەوەكانیان دەستپێكردووە.
ئەفسەرێكی پۆلیسی كەركووك بە (كوردستان تیڤی) راگەیاند: ئەمشەو لە گەڕەكێكی سەنتەری شاری كەركووك، ئافرەتێك بەهۆی لێدانی دەرزییەوە گیانی لەدەستداوە.
راشیگەیاند: ئافرەتەكە ناوی (ئەحلام خەلەف) تەمەن 35 ساڵ لە نەتەوەی عەرەبە، بەهۆی نەخۆشییەوە سەردانی دەرمانخانەیەكی گەڕەكەكەیانی كردووە.
هەروەها رایگەیاند: لەلایەن پەرستارێكەوە دەرزی لە ئافرەتەكە دراوە و بەهۆیەوە گیانی لەدەستداوە.
ئەو ئەفسەرەی پۆلیسی كەركووك ئاماژەی بەوەشدا كە لێكۆڵینەوەكان سەبارەت بە رووداوەكە دەستی پێكردووە و تەرمی ئافرەتەكەش رەوانەی پزیشكی دادی كراوە بۆ دڵنیابوونەوە لە هۆكاری گیانلەدەستدانەكەی.
