Îro duşem 16ê Çiriya paşîn a 2026an, Kazim Gerîbabadî, alîkarê yasayî yê wezîrê derve yê Îranê, di hevpeyvînekê de bi televîzyona fermî ya welatê xwe re, ku êvara duh yekşemê hatibû weşandin, ragihand: "DYA di bersiva pêşniyara Îranê de, pêkanîna hin mercên xwe ji bo qonaxên paşerojê paşde xistiye; ev jî wateya wê ye ku di vê rewşê de ne gengaz e ku bigihîjin tu lihevhatinekê".
Kazim Gerîbabadî herwiha îşaret bi vê yekê kir ku DYA îsbat kiriye ku cihê baweriyê nîne û got: "Berî her tiştî, divê DYA garantiyên pêwîst bide ku hemû mercên Îranê bên pêkanîn". Di heman demê de eşkere kir ku maweya plana Îranê ji bo vekirina Tengava Hurmuzê ji heft rojan bo du rojan hatiye kêmkirin.
Ev gotin piştî wê hatin ku Mihemed Baqir Qalîbaf, serokê parlementoya Îranê, careke din mercên heft xalan ên welatê xwe anîn bîra xwe û tekez kir ku Tehran dê di rewşa ne şer û ne aştiyê de bidome.
Meha borî Îranê pêşniyarekî sererastkirî ji bo vekirina Tengava Hurmuzê li pêşiya keştiyariya navneteweyî pêşkêş kiribû. Di wê pêşniyarê de daxwaza rakirina dorpêça deryayî ya DYA li ser benderên Îranê, rakirina cezayan, rawestandina şer li hemû eniyan, berdana pereyên Îranê yên li derveyî welatê blokekirî, dayîna telafiya şerê ji aliyê DYA û Îsraîlê, dayîna garantiyên ewlehiyê û nasîna birêvebirina hevpar a Tengava Hurmuzê ji aliyê Îran û Omanê ve hatibû kirin. Lê heta niha DYA hin an hemû van mercan red kiriye û berdewam e li ser sepandina dorpêça deryayî û siyaseta "xeniqandina aborî" li dijî Îranê.







