ئەمڕۆ هەینی 30ـی تشرینی یەکەمی 2026، وەزارەتی ڕۆشنبیری و گەشتوگوزاری تورکیا لە داتایەکی فەرمیدا لەسەر زاری محەمەد نوری ئەرسۆی، وەزیری گەشتوگوزار بڵاوی کردەوە: داهاتی کەرتی گەشتیاری لە ماوەی نۆ مانگی یەکەمی ساڵی (2026)ـدا گەیشتووەتە (51 ملیار و 278 ملیۆن دۆلار)، کە بەراورد بە هەمان ماوەی ساڵی ڕابردوو، بە ڕێژەی 2.4% زیادی کردووە.
لە ڕاگەیەندراوەکەدا هاتووە، لەو ماوەیەدا تورکیا پێشوازیی لە نزیکەی (49.1) ملیۆن گەشتیار کردووە، لە ڕووی ژمارەی گەشتیارانیشەوە هاووڵاتییانی ڕووسیا لە پلەی یەکەمی سەردانکەراندا بوون و لە دوای ئەوانیش گەشتیارانی ئەڵمانیا لە پلەی دووەم و بەریتانییەکان لە پلەی سێیەمدا هاتوون.
وەزارەتی گەشتوگوزاری تورکیا ڕوونیکردەوە کە داهاتی کەرتی گەشتیاری تەنیا لە چارەکی سێیەمی ئەمساڵدا گەیشتووەتە (25.5) ملیار دۆلار، کە گەشەکردنێکی بە ڕێژەی 5% تۆمار کردووە، هاوکات تێکڕای خەرجیی هەر گەشتیارێک بۆ یەک شەو مانەوە بۆ (107.7) دۆلار بەرز بووەتەوە، کە بە ڕێژەی 4.6% زیادی کردووە.
لە کۆتایی ڕاگەیەندراوەکەدا هاتووە، کەرتی گەشتیاریی تورکیا توانیویەتی ئەم داهات و ئامارە بەرزانە بەدەستبهێنێت سەرەڕای ئەو ئاڵنگارییانەی کە بەهۆی گرژییە هەرێمییەکان و بەرزبوونەوەی تێچووی گەشتە ئاسمانییەکانەوە دروست ببوون.
