ئایگۆر ڕیشیتۆڤ، ئەکادیمی و بەڕێوەبەری کلینیکی شێرپەنجە و نەشتەرگەریی چاکسازی لە زانکۆی "سیتشینۆڤ"، ڕایگەیاند کە شێرپەنجەی بەشی دەم و قوڕگ (Oropharyngeal cancer) لە ئێستادا بەربڵاوترین جۆری وەرەمە شێرپەنجەییەکانە لە ناوچەی سەر و ملدا.
بەگوێرەی گوتەکانی ئەم پسپۆڕە، زیادبوونی حاڵەتەکانی ئەم جۆرە شێرپەنجەیە پەیوەندییەکی ڕاستەوخۆی بە بڵاوبوونەوەی ڤایرۆسی "پاپیلۆمای مرۆیی" (HPV) و ڤایرۆسی ئێپشتاین-بار" (EBV) هەیە. ڤایرۆسی یەکەم بەرپرسە لە گەشەکردنی شێرپەنجەی دەم و
قوڕگ، لە کاتێکدا ڤایرۆسی دووەم دەبێتە هۆی شێرپەنجەی بەشی پشتەوەی لووت.
تایبەتمەندی و مەترسییەکانی ئەم وەرەمە: ئەم جۆرە شێرپەنجەیە تەنها قوڕگ ناگرێتەوە، بەڵکو دەکرێت تووشی دەم، کڕکڕاگەی دەنگ، لووت، گیرفانە هەواییەکان (جیوب)، چاو، ڕژێنە لیکییەکان و غوودەی دەرەقیش ببێت. دکتۆر ڕیشیتۆڤ ئاماژەی بەوە کرد کە کۆی گشتیی حاڵەتەکانی شێرپەنجەی سەر و مل، نزیک دەبێتەوە لە ژمارەی تووشبووانی شێرپەنجەی مەمک.
ئەو پسپۆڕە جەختی لەوەش کردەوە کە نەشتەرگەریی ئەم وەرەمانە زۆر هەستیارە، چونکە جگە لە پاراستنی ژیانی نەخۆشەکە، پێویستە پزیشکەکە ئاگاداری ڕوخساری نەخۆش و توانای هەناسەدان، خواردن، قسەکردن و هەستەکانی تری بێت، چونکە ئەم نەخۆشییە کاریگەرییەکی گەورە لەسەر کوالێتیی ژیان جێدەهێڵێت.
هۆکارە نوێیەکان و ڕێگاکانی خۆپاراستن: ئەم ئەکادیمیستە هۆشداری توند دەدات لەوەی کە "جگەرەی ئەلیکترۆنی" (Vaping) مەترسییەکی کیمیایی نوێیە و هیچ جۆرە جگەرەکێشانێکی بێوەی بوونی نییە. جگەرەی ئەلیکترۆنی وەک جگەرەی ئاسایی ئەگەری تووشبوون بە شێرپەنجەی قوڕگ زیاد دەکات و تەنها جۆری ماددە شێرپەنجەییەکە گۆڕاوە.
بۆ خۆپاراستن، پزیشکان ئامۆژگاری دەدەن بە:
1. پەیڕەوکردنی شێوازێکی ژیانی تەندروست و وازهێنان لە جگەرە و کحول.
2. چارەسەرکردنی هەوکردنی درێژخایەنی لەوزەتێنەکان، گۆشتی زیادەی لووت و هەوکردنی پووک لە قۆناغە سەرەتاییەکاندا.
3. پشتگوێنەخستنی کێشە تەندروستییەکان تاوەکو نەبنە نەخۆشییەکی کوشندە.
