ئەمڕۆ سێشەممە 3ـی تشرینی دووەمی 2026، شاندێکی باڵای حکوومەتی هەرێمی کوردستان بە سەرۆکایەتیی بێگەرد تاڵەبانی، وەزیری کشتوکاڵ و سەرچاوەکانی ئاو، لەسەر بنەمای بانگهێشتنامەیەکی فەرمیی وەزیری کشتوکاڵی وڵاتی چیک گەیشتە ئەو وڵاتە، شاندەکە پێکهاتووە لە ڕاوێژکاری سەرۆکوەزیرانی هەرێمی کوردستان بۆ کاروباری ئاو، بەڕێوەبەرانی گشتیی سەرچاوەکانی ئاو، بەنداوەکان، سامانی ئاژەڵ و ڤێتێرنەری، بە یاوەریی ژمارەیەکی زۆر لە کۆمپانیاکانی هەرێمی کوردستان لە بواری ئاو، کشتوکاڵ، سامانی ئاژەڵ و ڤێتێرنەری.
بڕیارە لە چەند ڕۆژی داهاتوودا دیدارێکی تایبەت لە نێوان شاندی هەرێمی کوردستان و وەزیری کشتوکاڵی حکوومەتی چیک ئەنجام بدرێت، هەروەها کۆڕبەندێکی کشتوکاڵی بۆ کۆمپانیاکانی نێوان هەرێمی کوردستان و وڵاتی چیک بە ئامادەبوونی هەردوو وەزیر ڕێکبخرێت.
هاوکات لە کارنامەی سەردانەکەدا چەندین بەسەرکردنەوەی مەیدانی لە بواری کشتوکاڵ، پۆند، بەنداو، چۆنیەتیی ئیدارەدانی ئاو، سامانی ئاژەڵ و ڤێتێرنەری ئەنجام دەدرێن، ئەم سەردانەش بە مەبەستی برەودان بە پەیوەندییەکانی نێوان هەردوولا، زیادکردنی ئاڵوگۆڕی بازرگانی، ڕەخساندنی هەلی کار، سوودوەرگرتن لە ئەزموونی پێشکەوتووی یەکتر و دەستەبەرکردنی دەرفەتی نوێی وەبەرهێنانە لە سەرجەم بوارەکاندا.
