سەرۆکایەتیی ئەنجومەنی وەزیرانی هەرێمی کوردستان لە ڕوونکردنەوەیەکدا سەرلەبەری ئەو دەنگۆ ناڕاست و هەڵبەستراوانەی ڕەتکردەوە کە لەبارەی ناوەڕۆکی کۆبوونەوەکانی فالح فەییاز، سەرۆکی دەستەی حەشدی شەعبی لەگەڵ سەرکردایەتیی هەرێمی کوردستان بڵاوکراونەتەوە، و جەختی کردەوە تەواوی کۆبوونەوەکان لەسەر بنەمای لێکتێگەیشتن و چارەسەرکردنی کێشەکان بووە لە چوارچێوەی دەستووردا.
سەرۆکایەتیی ئەنجومەنی وەزیران ڕایگەیاند، ڕۆژی شەممە لە میانی سەردانی فالح فەییاز بۆ هەرێمی کوردستان و ئەنجامدانی دیدار و کۆبوونەوە لەگەڵ سەرۆک بارزانی، نێچیرڤان بارزانی سەرۆکی هەرێمی کوردستان و مەسرور بارزانی سەرۆکی حکوومەتی هەرێمی کوردستان، بە شێوەیەکی گرنگ گفتوگۆ لەبارەی چارەسەرکردنی کێشە هەڵپەسێردراوەکانی نێوان هەرێمی کوردستان و حکوومەتی فیدراڵ کراوە، بەتایبەت دۆسیەکانی بودجە، نەوت و دەروازە سنوورییەکان.
لە ڕوونکردنەوەکەدا هاتووە، لە هەندێک لە دەزگاکانی ڕاگەیاندندا دەنگۆی ناڕاست و هەڵبەستراو لەبارەی ناوەڕۆکی کۆبوونەوەکان بڵاوکراونەتەوە کە هیچ بنەمایەکیان نییە و دوورن لە ڕاستییەوە.
سەرۆکایەتیی ئەنجومەنی وەزیران دووپاتی کردەوە کە بە پێچەوانەی ئەو دەنگۆیانە، لە دیدارەکاندا هەموو لایەک هاوڕا بوون لەسەر ئەوەی پێویستە سەرجەم کێشەکانی نێوان هەرێمی کوردستان و حکوومەتی فیدراڵ، بە دیالۆگ و لێکتێگەیشتنی هاوبەش و لە چوارچێوەی دەستووری عێراقدا چارەسەر بکرێن.







