گوتەبێژی حکوومەتی عێراق ئەمڕۆ دووشەممە کۆتایی بەو دەنگۆیانە هێنا كە سەبارەت بە سڕینەوەی سفڕەکانی سەر دراوی عێراقی باس دەكران.
حەیدەر عبوودی گوتەبێژی حکوومەتی عێراق بە ئاژانسی فەرمی عێراقی ڕاگەیاند: ئەنجوومەنی وەزیرانی عێراق هیچ بڕیارێکی سەبارەت بە سڕینەوەی سفرەکانی سەر دراو نەداوە.
راشیگەیاند: بڕیاری لەو شێوەیە و سڕینەوەی سفرەکانی سەر دراوی عێراقی، پێویستی بە دەرکردنی یاسایە لەلایەن پەرلەمانەوە.
پێشتر مستەفا سەند وەزیری گەیاندنی عێراق رایگەیاندبوو كە لە ئەنجوومەنی وەزیرانی عێراق داوای گۆڕینی دراو و سڕینەوەی سفرەکان كراوە. بڵاوكردنەوەی ئەم هەواڵەش پرسیاری زۆری لەلایەن ئابووریناسان و هاووڵاتییانەوە لەسەر ڕاستیی بڕیارەکە و کاتی جێبەجێکردنی دروست کردبوو.
