ئەمڕۆ پێنجشەممە هێڵی ئاسمانیی عێراق ڕایگەیاند، دوای تێپەڕبوونی پێنج مانگ لە ڕاگرتنیان، گەشتە ئاسمانییەکان بۆ موسکۆی پایتەختی ڕووسیا دەست پێ دەکاتەوە.
کۆمپانیاکە لە ڕاگەیەندراوێکدا ئاماژەی بەوە کردووە: گەشتەکانی هێڵی ئاسمانیی عێراق لە بەغداوە بۆ موسکۆ و بەپێچەوانەوە، لە ڕۆژی سێشەممەی داهاتوو رێكەوتی 4ی ئابی 2026 دەست پێ دەکەنەوە.
لە ڕاگەیەندراوەکەدا هەروەها هاتووە: گەشتەکان بەردەوام دەبن و هەفتەی دوو گەشت ئەنجام دەدرێن لە ڕۆژانی شەممە و سێشەممەدا.
دەستپێکردنەوەی ئەم گەشتانە دوای ئەوە دێت کە لە کۆتاییەكانی مانگی شوباتی ئەمساڵدا بەهۆی شەڕ و ئاڵۆزییەكانی ناوچەکە گەشتەکان ڕاگیرابوون، بەهەمانشێوە وەڵامدانەوەیەکە بۆ زیادبوونی داواکاریی هاووڵاتییان بۆ گەشتی ڕاستەوخۆ لە بەغداوە بۆ موسکۆ.
