ڕۆژنامەی نیویۆرک تایمزی ئەمریکی بڵاوی کردەوە، کە ئەمریکا بڕیاری داوە بە دەستپێکردنەوەی گواستنەوەی دۆلاری نەختینە بۆ عێراق، دوای ئەوەی بۆ ماوەی چەند مانگێک ئەو پڕۆسەیە بەهۆی نیگەرانییە ئەمنییەکان و وردبینیی داراییەوە ڕاگیرابوو.
بەپێی ڕاپۆرتەکە، وەزارەتی خەزێنەی ئەمریکا و بانکی یەدەگی فیدراڵی گەیشتوونەتە لێکتێگەیشتن لەگەڵ بانکی ناوەندیی عێراق بۆ ناردنی تەمویلی مانگانەی دۆلار. ئەم بڕیارە دوای ئەوە دێت کە حکوومەتەکەی عەلی زەیدی، سەرۆک وەزیرانی نوێی عێراق، کۆمەڵێک ڕێکاری توندی بۆ چاودێریکردنی جووڵەی دراو و ڕووبەڕووبوونەوەی سپیکردنەوەی پارە گرتووەتە بەر، کە ئامانج لێی ڕێگریکردنە لە دزەکردنی دۆلار بۆ ئەو وڵات و لایەنانەی لە ژێر سزاکانی ئەمریکادان.
وەستانی ناردنی دۆلار لە مانگەکانی ڕابردوودا، فشارێکی زۆری لەسەر بازاڕەکانی عێراق دروست کردبوو و بووە هۆی ناجێگیریی بەهای دینار بەرامبەر بە دۆلار. شارەزایانی ئابووری پێیان وایە کە دەستپێکردنەوەی گواستنەوەی پارە نەختینەییەکان، یارمەتیدەر دەبێت بۆ سەقامگیرکردنی بازاڕی دراو و کەمکردنەوەی نرخی کەلوپەل لە ناوخۆی وڵاتدا.
ئەم هەنگاوەی واشنتن هاوکاتە لەگەڵ ئامادەکارییەکانی عەلی زەیدی بۆ ئەنجامدانی یەکەم سەردانی فەرمیی خۆی بۆ کۆشکی سپی لە واشنتۆن. چاودێران دەڵێن ئەم بڕیارە وەک نیشانەیەکی "نیازپاکی" و متمانەی ئەمریکا بە چاکسازییە داراییەکانی ئەم دواییەی بەغدا دەبینرێت، کە ئامانج لێی تێکەڵکردنەوەی تەواوی کەرتی بانکیی عێراقە بە سیستەمی دارایی جیهانی لە ساڵی 2026دا.
