Îro Çarşem, 4ê Çiriya Paşîn a 2026an, Parlamentoya Kurdistanê bi amadebûna piraniya parlamenteran, civîna xwe ya yekem domand û di pêvajoyeke qanûnî û demokratîk de desteya serokatiya parlamentoyê hilbijart. Di vê derbarê de, Mehmûd Mihemed, berdevkê Partiya Demokrat a Kurdistanê, daxuyaniyek belav kir.
Berdevkê Partiyê ragihand: "Li gel pîrozbahiyên me ji bo hemû Kurdistanîyan, em serokê parlamentoyê, cîgir û sekreterê parlamentoyê pîroz dikin û di vê erkê neteweyî de serkeftinê ji wan re dixwazin. Ev gavek derengmayî lê pêwîst bû ji bo parastina statûya destûrî ya Herêma Kurdistanê. Mixabin, du sal in ku ji ber biryara siyasî ya serkirdayetiya Yekîtiya Niştimanî û Nifşê Nû, ev saziya rewa ya Herêmê, ku deng û îradeya gel temsîl dike, hatibû astengkirin".
Di daxuyaniyê de hatiye gotin: "Îro piraniya parlamenteran ji fraksiyonan, bi hestkirina wan a li hember erkê neteweyî, rêzgirtina ji dengê gel û pabendbûna wan bi sondê qanûnî, pêvajoya demokrasiyê serkeftî kirin û dawî li wê vala bûna qanûnî û ferzkirina xwe ya hindikahiyeke siyasî anîn. Ev jî tevî ku li dijî hin parlamenteran û malbatên wan gelek gef hatine kirin; ev nîşaneyeke xeterê ye û gef e li ser demokrasî û îradeya gel û derbirîna zihniyeteke ku xizmetê nade demokratîzekirina qadên jiyana civaka Kurdistanê".
Mehmûd Mihemed herwiha destnîşan kir: "Em hêvîdar in hemû alî rêzê ji daxwaz û îradeya gel û pêvajoya demokrasiyê bigirin. Parlamentoya Kurdistanê cihê rastîn ê gotûbêja siyasî û qanûnî ye û faktora yekrêzî û yekgirtina hundirîn a Kurdistanê ye".
Di dawiyê daxuyaniya berdevkê Partiya Demokrat a Kurdistanê de hatiye gotin: "Çalakbûna parlamentoyê li dijî tu kes û aliyekî nîne û derî ji bo hemû aliyan vekirî ye. Em hêvîdar in ku piştî çalakbûna Parlamentoya Kurdistanê, fraksiyonên aliyên din jî biryara erênî bidin û beşdarî parastina rewayî û statûya Herêma Kurdistanê bibin. Herwiha, ev gav bibe teşwîqeke ji bo hilgirtina berpirsiyariya hevbeş di pêşxistina Herêma Kurdistanê de di vê qonaxa hesas de û nêzîkkirina hemû dîtinan ji bo xizmeta gel û siberoja Kurdistanê".
