Şandekî hikûmeta Herêma Kurdistanê, ku ji wezîrê çavkaniyên siruştî û sekreterê giştî yê Encûmena Wezîran pêk hatibû, li gel hejmarek ji endamên Encûmena Nûnerên Iraqê, beşdarî civînek taybet bûn ku li avahiya Encûmena Wezaretên Aboriyê ya li paytexta Bexdayê hate lidarxistin, bi mebesta temamkirina gotûbêjan li ser budçeya Herêma Kurdistanê.
Li gorî daxuyaniyekê ji nivîsgeha ragihandinê ya cîgirê serokwezîrê Iraqê, di civînê de, ku bi serokatiya Mihemed Temîm, cîgirê serokwezîr, hate lidarxistin, qanûna budçeya giştî ya dewletê hate nîqaşkirin. Di rûniştinê de wezîrên neftê û avadaniyê û niştecihbûnê, serokê Dîwana Çavdêriya Darayî ya Federal, rêvebirê giştî yê beşa aboriyê ya Wezareta Neftê û şêwirmendê serokwezîrê Iraqê amade bûn.
Herwiha, li gorî daxuyaniyê, armanca vexwendina şanda hikûmeta Herêma Kurdistanê û nûnerên parlamentoyê, temamkirina têgihiştin û gotûbêjan li ser para Herêma Kurdistanê di qanûna budçeya giştî de bû.
Di beşekî din ê civînê de, bi awayekî berfireh li ser dosyaya mafên darayî yên mûçexwar û teqawîtkiriyan, hilberîna neftê li Herêma Kurdistanê, herwiha mesela lêçûnên serwerî û hakim di qanûna budçeyê de hate nîqaşkirin.
