Çavkaniyên ewlehiyê yên Îsraîlê eşkere kirin ku Dewletên Yekbûyî yên Amerîkayê di nav çend hefteyên bê de amadeyiya şandina leşker û balafirên şer ên zêdetir bo Îsraîlê dike. Ev jî wekî tedbîrekî pêşwext ji bo rûbirûbûna her îhtîmaleke zêdebûna leşkerî li herêmê ye, hevdem digel nêzîkbûna dema hilbijartinan li her du welatan.
Li gorî agahiyên malpera îsraîlî (Walla), niha nêzîkî 3,000 leşkerên Amerîkî li çendîn baregehên cuda yên Îsraîlê bi cih bûne. Erkê sereke yê van hêzan rêvebirina pergalên parastina asmanî, hêzên hewayî, tîmên piştgiriya lojîstîk û operasyonên baregeha fermandariyê ye. Di vê çarçoveyê de tê pêşbînîkirin ku digel guhertina dorê ya hêzan, konvoya nû ya hêz û balafirên şer bigihîje herêmê.
Di heman demê de rojnameya (Jerusalem Post) ragihand ku rêveberiya Donald Trump biryar daye ku keştiya sêyemîn a balafirhilgirê xwe, bi navê (USS Theodore Roosevelt), ligel fîrqeyeke din a hêzên piyadeyên deryayî (Marines), bişîne Rojhilata Navîn. Herwiha koma keştiyên amadebaş (USS Makin Island), bi nêzîkî 2,200 çekdarên Lîwaya 13-an a Marines û zêdetirî 2,000 deryavan, ji bo beşdarbûna vê erkê bi rê ketine.
Berpirsekî bilind ê Wezareta Parastina Îsraîlê ragihand ku dijminên wan bi baldarî rewşa hilbijartinan li Îsraîl û Amerîkayê dişopînin, da ku bizanin gelo dikarin bi riya êrîşê li pergala siyasî ya wan her du welatan bêîstiqrarî çêbikin; di heman demê de hişyarî da ku «dijmin dizanin ku vê carê bersiva Îsraîlê dê pir tund û êrîşkar be».
Di beşeke din a raporê de hatiye gotin ku artêşa Îsraîlê, bi hemahengiya tund digel Fermandeya Navendî ya Hêzên Amerîkayê (CENTCOM), ji bo îhtîmala derketina pevçûnekê bilez digel Îranê di rewşa amadeyiyê de ye; di demekê de ku Tehran bi krîzeke giran a aborî re dinalê, û bankek hedefê destnîşan kiriye ji bo lêdana cihên hestiyar ên Tehranê di îhtîmala her êrîşeke mûşekî ya li ser Îsraîl an Urdunê de.
